SQO-da 80-ge jýyq qaıyrshy ákimshilik jaýapkershilikke tartyldy

PETROPAVL. QazAqparat – Soltústik Qazaqstan oblysynda «Stop-trafık» jedel-profılaktıkalyq is-sharasy aıasynda 76 adam jurttyń mazasyn alǵany úshin jazalandy, dep habarlaıdy QazAqparat tilshisi.

SQO polıtsııa departamenti baspasóz qyzmetiniń málimetinshe, 22 qarasha men 1 jeltoqsan aralyǵynda oblys aýmaǵynda «Stop-trafık» jedel-profılaktıkalyq is-sharasy ótip jatyr. Onyń maqsaty – adam saýdasymen baılanysty qylmystardy anyqtaý, jolyn kesý jáne ashý. Polıtseıler adamdardy satýmen aınalysýy jáne seksýaldyq paıdalanýy múmkin degen nysandardy, saýnalardy, kóńil-kóterý oryndaryn, fermerlik sharýashylyqtardy tekserip jatyr.

Petropavldaǵy saýnalardyń birinde jeńgetaılyq faktisi anyqtaldy, taǵy bir saýna ákimshisi QR Ákimshilik quqyq buzýshylyq týraly kodeksiniń 450-babymen, jeńgetaılyqpen aınalysyp, úı-jaıdy usynǵany úshin ákimshilik jaýapkershilikke tartyldy. Sonymen qatar, tártip saqshylary operatsııa barysynda «Qoǵamdyq oryndarda tıisý» baby boıynsha 76 hattama toltyrdy.

«Tıisý uǵymyna qoǵamdyq oryndarda zattardy ózgeshe tásilmen satyp alý, satý, aıyrbastaý nemese ıemdený maqsatynda kásipkerlik sýbektisi bolyp tabylmaıtyn adam jasaǵan, sondaı-aq bal ashý, qaıyr suraý, seksýaldyq sıpatta qyzmetter kórsetý ne ózge de qyzmetter kórsetýdi kúshtep tańý maqsatynda tıisý, ıaǵnı mazalap ótinish bildirý kiretinin eske salamyz. Qaıyrshylyq ta quqyq buzýshylyq bolyp esepteledi jáne oǵan 5 AEK mólsherinde aıyppul salý túrindegi jaza qarastyrylǵan», - deıdi SQO PD krımınaldyq polıtsııa basqarmasynyń bastyǵy Marat Jumalıev.