SQO-da 8 oqýshy men bes muǵalim koronavırýs juqtyrdy

PETROPAVL. QazAqparat – Soltústik Qazaqstan oblysynda koronavırýstyń taralýyna baılanysty eki mektepte IV toqsan qashyqtan bastalýy múmkin, dep habarlaıdy QazAqparat tilshisi.

SQO bilim basqarmasynyń málimetinshe, óńirdegi Maǵjan Jumabaev, Taıynsha, Qyzyljar aýdandarynda jáne Petropavlda 8 oqýshy koronavırýs juqtyrǵan.

Qaýipti ınfektsııa 5 muǵalimnen anyqtaldy. Olar - Tımırıazev, Esil, Aıyrtaý aýdandarynyń jáne Petropavl qalasynyń ustazdary.

«KVI-diń taralýyna baılanysty óńirdegi eki mektep ІV toqsandy qashyqtan bastaýy múmkin. Qyzyljar aýdanyndaǵy Vagýlıno orta mektebinde 11 naýryzdan bastap shekteý sharalary engizildi. Toqsan bastalǵansha jaǵdaı túzelmese oqýshylar bilimdi qashyqtan alady. Al ekinshisi - M.Jumabaev aýdanyndaǵy Medvejınskoe orta mektebi», - deıdi Gúlmıra Kárimova.

Tórinshi toqsannan bastap SQO mektepteri aralas oqý formatyna kóshedi.

Epıdemıologııalyq ahýal únemi nazarda bolmaq. Muǵalim nemese oqýshy aýyrǵan jaǵdaıda oqý formaty ózgertilip, synyp karantınge ketedi.

Al mekteptiń birneshe synybynda aýrý oshaǵy tabylatyn bolsa, bilim ordasy qashyqtan oqýǵa kóshiriledi.

«Balalar arasynda da, ustazdar arasynda da qazir aýyrǵandar az. Oqýshylar kóbine eresekterden, ata-analary men týystarynan juqtyrady. Ári qaraı taramaýy úshin birden shara qoldanyp, karantınge jiberemiz. Bul óz nátıjesin berip jatyr», - deıdi SQO bilim basqarmasynyń jetekshisi Gúlmıra Kárimova.