SQO-da 8 myńnan astam adamnyń qarýy bar
PETROPAVL. QazAqparat – Soltústik Qazaqstan oblysynda jyl basynan 3 myń qarý ıesi tekserilip, 143 zań buzýshylyq anyqtaldy, dep habarlaıdy QazAqparat tilshisi.
SQO polıtsııa departamenti baspasóz qyzmetiniń málimetinshe, ótken jyldyń qańtar aıynan bastap azamattar qoldaǵy qarýǵa baılanysty memlekettik qyzmetterdi «elektrondy úkimet» portaly arqyly ala alady. Mundaı formattyń basymdyǵy kóp – sybaılas jemqorlyq táýekelderin tómendetedi, áýre-sarsańdy joıady.
Memlekettik qyzmetterdi paıdalaný úshin nebári elektrondy-tsıfrlyq qoltańba jáne qajetti qujattardyń elektrondy kóshirmesi bolsa jetkilikti. Qujattardyń tiziminde qarýdy ıelenýge qarsy kórsetimniń joqtyǵyn rastaıtyn 076Ý formasyndaǵy medıtsınalyq qorytyndy da bar. Sondaı-aq qarýdy qaýipsiz ustaý boıynsha anyqtama qajet. Budan bólek, ańshynyń jeke kýáligin jáne memlekettik bajdyń tólengenin rastaıtyn túbirtek kerek. Qujattar tizbesi boıynsha aqparatty Petropavlda 8 7152 39-48-68 telefony arqyly alýǵa bolady.
Memlekettik qyzmet 15 jumys kúni ishinde kórsetiledi. Jyl basynan «E-lıtsenzııalaý» formatynda 242 memlekettik qyzmet kórsetilgen. Qarýdy saqtaý jáne alyp júrý boıynsha – 181, qarýdy alýǵa qatysty 46 ótinish qaralǵan. Otyz bir adamnyń óitinishteri keri qaıtaryldy. Oǵan qujattardyń tolyq usynylmaýy sebep.
Polıtseıler qarý ıelerin zańnama normalaryn qatań ustanýǵa shaqyrady. Jyl basynan oblysta qarý saqtaý qaǵıdalarynyń 116 zań buzýshylyǵy anyqtaldy. Azamattar seıfte qarýdan basqa da zattardy saqtaǵan. Mamandardyń aıtýynsha, onda tipti qarýdyń qujattaryn da saqtaýǵa bolmaıdy. Taǵy 27 adam qarýdy qaıta tirkeý merzimin saqtamaǵan.
Jalpy SQO-da 8 myńnan astam qarý ıesi bolsa, jyl basynan solardyń 3 myńy tekserilgen.
