SQO-da 8 esirtki zerthanasy joıyldy
SQO Polıtsııa departamenti baspasóz qyzmetiniń málimetinshe, qańtardyń 24-i men 27-si aralyǵynda óńirde «Órmek» jedel-profılaktıkalyq is-sharasy ótti. Maqsat – esirtki zattarynyń zańsyz aınalymy faktilerin anyqtaý jáne jolyn kesý. Esirtki qylmysyna qarsy is-qımyl bólinisteri saptyq bólinistermen, ýchaskelik polıtsııa ınspektorlarymen ózara tyǵyz is-qımyl jasady.
Operatsııanyń 4 kúninde 8 esirtki qylmysy anyqtaldy, onyń 2-ýi satýǵa qatysty. Qylmyskerlerden 250 gramm marıhýana, 10 gramm sıntetıkalyq esirtki alyndy.
«Bizdiń basty mindetimiz – esirtki saýdasyn anyqtaý jáne satý arnalarynyń jolyn kesý. Qazirgi ýaqytta sıntetıkalyq esirtkimen kúres asa ózekti. Ótken jyly esirtki qylmysyna qarsy qarqyndy jumys júrgizildi. Nátıjesinde 197 fakti anyqtaldy, onyń 59-y satý boıynsha. Zańsyz aınalymnan 410 kg túrli esirtki jáne psıhotroptyq zattar alyndy. 12 aıdyń ishinde qyzmetkerler 8 esirtki zerthanasynyń jumysyn toqtatty, onyń tórteýi sıntetıkalyq esirtki jasaýmen aınalysqan», - deıdi SQO PD esirtki qylmysyna qarsy is-qımyl basqarmasynyń bastyǵy Jandos Basybaev.
