SQO-da 8 adam kólikti birneshe ret mas kúıinde júrgizgeni úshin qamaýǵa alyndy

PETROPAVL. QazAqparat – Soltústik Qazaqstan oblysynda bıyl 21 adam ómir boıyna kólik júrgizý quqyǵynan aıyryldy, dep habarlaıdy QazAqparat tilshisi.

SQO Polıtsııa departamenti baspasóz qyzmetiniń málimetinshe, jyl basynan óńir joldarynda kólikti mas kúıde tizgindegen 700-den astam júrgizýshi ustaldy. 44 júrgizýshi osy áreketteri úshin buryn kólik basqarý quqyǵynan aıyrylǵan. Olar qylmystyq jaýapqa tartyldy. Biraq keı júrgizýshiler budan sabaq alatyn emes.

Taıynsha aýdanynda kólikti mas kúıde basqarǵan 38 jastaǵy júrgizýshi ustaldy. Ol eki jyl buryn júrgizýshi kýáliginen bes jylǵa aıyrylǵan eken.

Qazirgi ýaqytta osyǵan uqsas 11 derek boıynsha materıaldar sottyń qaraýyna jiberildi. 21 soltústikqazaqstandyqqa qatysty sot úkimi shyqty. Olardyń barlyǵy kólik basqarý quqyǵynan ómir boıyna aıyryldy. 8 jaǵdaıda mas júrgizýshiler bas bostandyǵynan aıyryldy. Eń tómengi merzimi – 6 aı. Ózgeleriniń bas bostandyǵy shekteldi.

«Joldaǵy tártip – jol qozǵalysynyń barlyq qatysýshylarynyń qaýipsizdiginiń kepili. Qabyldanyp jatqan sharalardyń barlyǵy joldaǵy jaǵdaıdy jaqsartýǵa baǵyttalǵan. Ár júrgizýshi jol ústinde óziniń áreketine jaýapkershilikpen qaraýy tıis», - deıdi SQO PD bastyǵynyń birinshi orynbasary Qanat Aıtbaev.

Bıyl 7 aıda mas júrgizýshilerdiń kinásinen SQO joldarynda 14 jol-kólik oqıǵasy boldy. Saldarynan 3 adam qaza taýyp, 20-dan astamy jaraqattandy.