SQO-da 75 jastaǵy qarııa qujaty bolmaǵandyqtan zeınetaqy almaı kelgen
SQO polıtsııa departamenti baspasóz qyzmetiniń málimetinshe, Petropavldaǵy áleýmettik beıimdeý ortalyǵyna 75 jastaǵy er adam júgingen. Onyń bir de bir qujaty bolmaǵan. Ómir boıy Qazaqstanda turady, osynda mektepti támamdap, jumys istegen. Keıin barlyq qujattaryn: týý týraly kýáligi men 1974 jylǵy úlgidegi tólqujatyn osydan birneshe jyl buryn joǵaltyp alǵan eken.
«Ómirdiń qıyn jaǵdaıyna tap bolǵan ol qujattaryn resimdeý úshin ýaqytynda tıisti organǵa júgine almaǵan. Kóshi-qon qyzmetinde oǵan qajetti qujattardy tez arada jınaýǵa kómektesti. Keıin qysqa merzim ishinde ony Qazaqstan Respýblıkasynyń azamaty dep tanyp, jeke kýálik berildi. Óz mindetterin adal atqarǵany jáne adamdarǵa iltıpattylyq tanytqany úshin alǵys bildiremiz», - dep jazdy Petropavl áleýmettik beıimdeý ortalyǵy basshysynyń mindetin atqarýshy Qýanysh Tájibaev SQO PD bastyǵy Marat Tólebaevtyń atyna jazǵan alǵys hatta.
Ortalyqtyń mamany Tatıana Frolovanyń aıtýynsha, jyl basynan polıtsııa ótinish boıynsha 16 adamǵa qujat alýǵa kómektesti. Qazirgi ýaqytta taǵy 3 adamdy qujattandyrý boıynsha jumys júrgizilip jatyr.
«75 jastaǵy er adam ózi jaıly tolyq derek bermegendikten oǵan qujat jasaýda biraz qıyndyqtar boldy. Eski úlgidegi pasportty ol Pavlodarda alǵan eken. Biz ol jaqtan qajetti málimetterdi surattyq. 8 maýsymda er
adamdy QR azamaty dep taný týraly sheshim qabyldandy. Endi ol ózge de qazaqstandyqtarmen birdeı zeınetaqy men barlyq memlekettik qyzmetterdi ala alady», - deıdi kóshi-qon qyzmetiniń aǵa ınspektory Darına Súleımenova.
Jyl basynan SQO-da 1974 jylǵy úlgidegi pasporttary bar 37 adam men buryn ýaqtyly qujattaryn almaǵan 40 adam QR azamattary dep tanyldy.