SQO-da 74 jastaǵy zeınetker mas bolyp kólik aıdaǵany úshin 5 jylǵa sottalýy múmkin

PETROPAVL. QazAqparat – Soltústik Qazaqstan oblysynda 74 jastaǵy er adam úsh aı ótpeı kólikti qaıta mas kúıde basqaryp ustaldy. Endi zeınetker 5 jylǵa deıin bas bostandyǵynan aıyrylýy múmkin, dep habarlaıdy QazAqparat tilshisi.

SQO polıtsııa departamenti baspasóz qyzmetiniń málimetinshe, Qyzyljar aýdanynyń ortalyǵy Beskól aýylynda ýchaskelik polıtsııa ınspektory tekserý maqsatymen «Ssang Yong» avtokóligin toqtatqan.

Polıtsııa qyzmetkerine kólikti basqaryp kele jatqan 74 jastaǵy jergilikti turǵyn jaqsy tanys.

Ol bıyl qańtar aıynda mas kúıinde kólik tizgindegeni úshin júrgizýshi kýáliginen aıyrylǵan. Kólik ıesi budan sabaq almaǵan.

Sot sheshimin elemegen odan ishimdiktiń ıisi shyǵyp turǵan.

Medıtsınalyq kýálandyrý onyń qaıtadan ortasha mas kúıde kólik júrgizgendigin kórsetti. Atalǵan fakti QR Qylmystyq kodeksiniń 346-baby boıynsha Sotqa deıingi tergep-tekserýlerdiń biryńǵaı tiziliminde tirkeldi.

«Baptyń sanktsııasy 5 myń AEK deıingi mólsherde aıyppul salýdan 5 jylǵa deıingi merzimge bas bostandyǵynan aıyrýǵa deıingi jazany kózdeıdi, sondaı-aq zań buzýshy ómir boıy kólik júrgizý quqyǵynan aıyrylady. Avtokólik aıyp turaǵyna qoıyldy», - deıdi Qyzyljar aýdandyq polıtsııa bóliminiń bastyǵy Álıhan Baıqadamov.

Jyl basynan oblys joldarynda kólik basqarý quqyǵynan aıyrylǵan 10 mas júrgizýshi ustaldy.