SQO-da 74 mektepte tyıym salynǵan kontentke qol jetkizýge tosqaýyl qoıyldy
PETROPAVL. KAZINFORM – Soltústik Qazaqstan oblysynyń prokýratýra organdary kámeletke tolmaǵandardyń quqyqtary men múddelerin qorǵaý aıasynda bilim berý mekemelerinde tyıym salynǵan ınternet-resýrstarǵa qol jetkizýdi shektedi.
Taldaý nátıjesinde Ǵ.Músirepov, Qyzyljar, Tımırıazev, Ýálıhanov aýdandary men Petropavl qalasynyń jalpy bilim berý mekemelerinde «Bilim týraly» Zańnyń 43-baby talaptarynyń óreskel buzylǵany anyqtaldy.
- Belgilengen normalarǵa qaramastan, 74 mektepte oqýshylardyń ómiri men densaýlyǵyna qaýip tóndiretin áreketterge, sonyń ishinde sýıtsıd pen zorlyq-zombylyqqa ıtermeleıtin materıaldar bar tyıym salynǵan saıttarǵa erkin qol jetkizýge múmkindik bolǵan.
Prokýratýra qaýlylary negizinde bilim berý uıymdarynyń basshylary Ákimshilik quqyq buzýshylyq týraly kodekstiń 409-baby 7-2-bóligi boıynsha aıyppul túrinde ákimshilik jaýapkershilikke tartyldy, - delingen aqparatta.
Sonymen qatar, prokýrorlardyń usynystarynan keıin barlyq atalǵan mektepterde tyıym salynǵan ınternet-resýrstarǵa qoljetimdilik tolyq shekteldi.
Qabyldanǵan sharalardyń nátıjesinde 11 myńnan astam balanyń quqyqtary qorǵaldy.
Prokýratýra kámeletke tolmaǵandardyń quqyqtary men zańdy múddeleri buzylǵan jaǵdaıda, zańdy ókilder men balalarǵa 8 (7152) 36-03-59 senim telefonyna habarlasýǵa bolatynyn eske saldy.
Aıta keteıik, SQO-da jańa oqý jylynda eki jańa mektep paıdalanýǵa beriledi.