SQO-da 73 jastaǵy er adam tútin datchıginiń arqasynda aman qaldy

PETROPAVL. QazAqparat – Soltústik Qazaqstan oblysynda aýyldyń 73 jastaǵy turǵyny tútin datchıginiń der kezinde iske qosylýynan órtten aman qaldy, dep habarlaıdy QazAqparat tilshisi.

SQO tótenshe jaǵdaılar departamenti bastyǵynyń orynbasary Dmıtrıı Rastıhınniń aıtýynsha, órtke qarsy datchıkter óz tıimdiligin kórsetip jatyr.

«Jaqynda Ǵabıt Músirepov atyndaǵy aýdannyń Chıstopole eldi mekeninde turǵyn úıden órt shyqty. Jatyn bólmesinde alańsyz uıyqtap jatqan er adam túnniń bir ýaǵynda qatty dybystan oıanǵan. Úıdegi tútin datchıgi iske qosylǵan eken. 1950 jyly týǵan úı ıesi kók tútinge oranǵan úıden eńbektep aman-esen shyqty. Bul kezde órt sóndirýshiler de jetip, jalynmen kúresti qolǵa alǵan edi», - deıdi Dmıtrıı Rastıhın.

Bul úıge saqtandyrý qurylǵysy jylytý kezeńi bastalar aldynda, ótken jyldyń 10 qyrkúıeginde ornatylǵan eken.

«Osy jylytý kezeńinde halyqtyń áleýmettik osal toptarynyń úılerine 1255 datchık ornatyldy. Onyń 1127-si kómirtegi totyǵyna, 128-i – tútinge qarsy qurylǵy, bolashaqta taǵy 248 datchık ornatý josparlanǵan», - deıdi Dmıtrıı Rastıhın.

Jyl bastalǵaly SQO-da órt shyqpaı, ıis tıip ýlanǵan 18 adam dáriger kómegine júgindi. Bir adam qaıtys boldy.

Tek ótken aptada SQO Esil aýdanynda bir otbasynyń 3 adamy ıis tıip, aýrýhanaǵa tústi. Oǵan úı ıesiniń pesh murjasyn erte jaýyp tastaýy sebep bolǵan.