SQO-da 71 jastaǵy zeınetker sarymsaq ósirip, odan on túrli ónim alyp otyr
PETROPAVL. KAZINFORM – Soltústik Qazaqstan oblysynda «Bir aýyl – bir ónim» jobasy aıasynda 32 taýar óndirýshi qatysqan jármeńke-kórme ótti.
SQO kásipkerler palatasynyń uıymdastyrýymen ótken is-sharaǵa oblystyń barlyq aýdandarynan jáne Petropavldan jeke kásipkerler qatysty. Bıyl ol úshinshi jyl qatarynan uıymdastyrylyp, qala kúnine tuspa-tus keldi.
- Japonııa úlgisine negizdelgen bul jobanyń basty maqsaty – jergilikti shıkizattan óndiriletin ónimderdi damytý, aýylda shyǵatyn erekshe taýarlardy anyqtap, olardan básekege qabiletti óńirlik brendter qalyptastyrý.
Qatysýshylardyń qatarynda qala kásipkerlerimen qatar aýyl turǵyndary da bar. Olar sút, et, bal, naýbaıhana jáne kondıterlik ónimder, ulttyq stıldegi kıim men toqyma buıymdardy, aǵashtan jasalǵan zattar men kádesyı ónimderin ákelip otyr, - deıdi SQO kásipkerler palatasynyń dırektory Esjan Orazalın.
SQO-da joba alǵash bastalǵanda 16 ǵana kásipker qatyssa, ótken jyly – 24, al bıyl 32 kásipker óz ónimderin usynyp otyr.
Jobaǵa alǵash ret qatysyp otyrǵandardyń biri – Ǵ. Músirepov atyndaǵy aýdannyń omartashysy Lılııa Shýtskaıa. Ol omartashylyqpen 29 jyl aınalysady. Bul joly kúnbaǵys, raps, qaraqumyqtan alynǵan bal túrlerin kórmege usyndy.
Kórmege kelýshilerdiń erekshe qyzyǵýshylyǵyn týdyrǵandardyń biri - Maǵjan Jumabaev aýdany, Vozvyshenka aýylynan kelgen Edýard Ýlman. Ol jubaıy Natalıamen birge jeti jyldan beri sarymsaq ósirýmen aınalysady.
- Jasym 71-de. Sarymsaq ósirýmen aınalysqannan beri aýyrǵan emespin, sebebi óz óndirisimizdegi fermenttelgen sarymsaqty turaqty qoldanamyn. Bul ónim ár dárihanada bolýy tıis dep esepteımin. Biz ekologııalyq taza, birinshi reprodýktsııaly sarymsaq ósiremiz.
Qazaqstannyń túkpir-túkpirine jáne Reseıdiń 52 óńirine, Tájikstan men Germanııaǵa da tuqymdyq ónim jiberdik. Jylyna 4 tonnaǵa deıin sarymsaq alamyz, - deıdi Edýard Ýlman.
Erli-zaıypty Ýlman otbasylyq kásipti damyta otyryp, endi daıyn ónimder óndirisine kóshken. Qazirgi tańda olar sarymsaqtan emdik jáne taǵamdyq 20-ǵa jýyq ónim túrin shyǵarmaqshy. Kórmege sonyń 10 túrin ákeldi. Onyń ishinde – sarymsaq tuzdyǵy, shaıǵa arnalǵan qospalar men «jastyq elıksıri» sekildi ónimder bar.
Uıymdastyrýshylardyń aıtýynsha, kórme qorytyndysy boıynsha úzdik ondyqqa engen qatysýshylar jobanyń ekinshi kezeńine ótedi. Al óńirlik brend komıteti olardyń arasynan úsh úzdikti tańdap, respýblıkalyq «Bir aýyl – bir ónim» kórmesine joldama beredi. Bul kásipkerlerge óz ónimderin naryqqa shyǵarýǵa úlken múmkindik bermek.
Buǵan deıin SQO-daǵy atbegiler áýleti – Mahatovtar otbasy týraly jazǵan edik.
