SQO-da 71 myńnan astam adam vaktsına saldyrdy
PETROPAVL. QazAqparat – Soltústik Qazaqstan oblysynda 71 myńnan astam adam koronavırýs vaktsınasyn saldyrdy. Solardyń 38 myńy ekpeniń tolyq kýrsynan ótti, dep habarlaıdy QazAqparat tilshisi.
Infektsıonıst-dáriger Ǵalııa Syzdyqova Petropavldaǵy №1 qalalyq aýrýhananyń ınfektsııalyq bóliminde eńbek etedi. Koronavırýs ınfektsııasy órshigen kezde, statsıonarlarǵa túsken syrqattardy qabyldap, bel ortasynda júrdi.
Dárigerdiń aıtýynsha, eń alǵash ınfektsııalyq bólimge jatqyzylǵan naýqastarda aýrý belgileri bolmaǵan.
«Alǵashqy syrqattarymyz aýyrǵan joq, tek vırýs juqtyrǵanyn rastaıtyn PTR testteri ǵana boldy. Ótken jyldyń maýsym aıynan bastap naýqastar aýyr halde túse bastady. Basynda boıymyzdy úreı bıledi. Óıtkeni ne isteıtinimizdi, qalaı emdeıtinimizdi bilmedik. Al, shilde aıynda naýqastardyń kóp bolǵany sonsha, jatqyzatyn oryn tappaı qaldyq», - deıdi Ǵalııa Syzdyqova.
Infektsıonıster birinshi bolyp koronavırýsqa qarsy ekpe aldy. Búginde dárigerlerdiń basym bóligi vaktsınatsııanyń tolyq kýrsynan ótti.
«Infektsııany jeńý úshin adamnyń ımmýnıteti myqty bolýy kerek. Adamdar vaktsına vırýsty jeńbeıtinin túsinýi kerek, ol ımmýntetti jaqsartady, antıdene qalyptastyrady. Sondyqtan qazirgi ýaqytta ekpe alý eń durys sheshim dep oılaımyn. Azamattar tek ózderin ǵana emes, jaqyndaryn, týǵan-týystaryn, aınalasyndaǵylardy oılaýy qajet», - deıdi dáriger.
SQO densaýlyq saqtaý basqarmasy baspasóz qyzmetiniń málimetinshe, oblysta 71 448 adam koronavırýs vaktsınasynyń birinshi komponentin, 37985 adam eki komponentin saldyrdy. Sonyń ishinde 2 myńy qazaqstandyq, 5,5 myńy Birikken Arab Ámirliginiń vaktsınasy bolsa, qalǵany «Spýtnık V».
Jalpy SQO óńirlerdegi epıdemıologııalyq ahýaldy baǵalaý matrıtsasyna sáıkes 24 mamyrdan bastap «sary» aımaqta.
Ótken táýlikte oblysta KVI juqtyrýdyń jańa 40 jaǵdaıy tirkeldi. Infektsııalyq statsıonarlar búginde 34 %-ǵa tolyq. Em alyp jatqandardyń 18-iniń jaǵdaıy aýyr.
