SQO-da 700 myń ga jer memleket menshigine qaıtaryldy
PETROPAVL. KAZINFORM — Soltústik Qazaqstan oblysynda sońǵy úsh jylda paıdalanylmaı jatqan 738,2 myń gektar aýyl sharýashylyǵy jerleri memleket menshigine qaıtaryldy.
«AMANAT» partııasynyń oblystyq fılıalynda «Jer amanaty» óńirlik komıssııasynyń otyrysy ótti. Mamandardyń aıtýynsha, qaıtarylǵan jerlerdiń shamamen 140 myń gektary — egistik jáne 551 myń gektardan astamy jaıylymdyq jer.
SQO Jer resýrstaryn basqarý departamentiniń basshysy Jalǵas Súleımenovtiń aıtýynsha, 2025 jyldyń basynan beri vedomstvo 270 myń gektarǵa jýyq alqapty qamtyǵan 129 tekseris júrgizgen. Nátıjesinde 81 zań buzý anyqtalyp, 8,9 mln teńge aıyppul salynǵan. Sonymen qatar, bıýdjetke 116 mln teńgeden astam qosymsha salyq túsken. Onyń aıtýynsha, keıbir sharýashylyqtar paıdalanylmaı jatqan jerlerden óz erkimen bas tartqan, bul shamamen 30 myń gektar jerdiń memleket menshigine qaıtarylýyna múmkindik berdi.
SQO Aýyl sharýashylyǵy jáne jer qatynastary basqarmasy basshysynyń orynbasary Ashat Ramazanov qaıtarylǵan jerlerdiń 387 myń gektardan astamy aýyl turǵyndary men agrarıılerdiń qajettilikterin qanaǵattandyrý úshin qaıta bólingenin atap ótti. Mamandar bıyl 100 myń gektardy qaıtarýy tıis bolatyn. Búgingi kúni sonyń 64% oryndaldy.
— Taıynsha aýdanynda — 35%, Aqjar aýdanynda — 37%, Aıyrtaý aýdanynda 41,5% deńgeıinde ǵana jospar oryndaldy. Jyl sońyna deıin bul aýdandar qýyp jetý úshin jumysty kúsheıtedi dep senemiz, — dedi Ashat Ramazanov.
Buǵan deıin elimizde áli de 10 mln gektar jer paıdalanylmaı bos jatqanyn jazǵan edik.