SQO-da 7-synyp oqýshysy golografııalyq sózdik oılap tapty
PETROPAVL. KAZINFORM — Soltústik Qazaqstan oblysy Belov orta mektebiniń 7-synyp oqýshysy Veronıka Pechenkına golografııalyq aýdarmasy bar «Magic Dictionary» biregeı qosymshasyn jasady.
Oqýshy jasaǵan bul qosymsha aǵylshyn tilin úırenýdi qyzyqty protseske aınaldyrmaq. Ony Android qosymshasy arqyly iske qosýǵa bolady.
SQO bilim basqarmasy baspasóz qyzmetiniń málimetinshe, qosymsha English Plus 5 oqýlyǵynyń leksıkasy negizinde jasalyp, vızýalızatsııa jasaýǵa keletin sózder tańdalady. Belgisiz sózdi osy «sıqyrly sózdikke» engizgen qoldanýshy qurylǵy ekranyna móldir pıramıdany ornatady. Osydan keıin sózdiń maǵynasyn beretin zat tórt jaǵynan kólemdi gologramma túrinde keskindeledi.
Golografııalyq keskinmen birge aýdıo oqylym júredi, bul maǵynany túsinýge ǵana emes, onyń aıtylýyn durys ıgerýge de kómektesedi.
Bul tásil oqýshylarǵa aǵylshyn tilin jeńil, ári qyzyqty formada meńgerýge sep. Qazir «Magic Dictionary» qosymshasy ustazdar arasynda qyzyǵýshylyq týdyryp otyr. Al joba avtory — Veronıka Pechenkına qosymshany jetildirip, onyń mindetterin keńeıtýdi josparlaǵan.
Buǵan deıin petropavldyq boıjetken Aıajan Qoıshybaı qazaqsha fılm, mýltfılmder ınternette qoljetimdi bolýy úshin sheteldik týyndylarǵa dýblıaj jasap júrgenin jazǵan edik.