SQO-da 7 myńnan astam qańǵybas ıt pen mysyq joıyldy
PETROPAVL. QazAqparat - Soltústikqazaqstandyq mal dárigerleri alǵashqy jarty jylda atqarylǵan jumystardyń qorytyndysyn shyǵardy, dep habarlaıdy «QazAqparat» HAA tilshisi oblystyq mal dárigerligi basqarmasyna silteme jasap.
Mal dárigerligi beketiniń negizgi jumysy aýyl sharýashylyǵy janýarlary aýrýlarynyń aldyn alý jáne olardy anyqtaý. 6 aı ishinde oblysta 590 myń bas iri qara jáne usaq mal, jylqylar men shoshqalar brýtsellez tekserisinen ótti. 256 849 bas iri qara mal, 313 449 bas usaq mal, 3 285 bas jylqy jáne 63 981 bas shoshqaǵa topalańǵa qarsy vaktsına egildi. Mal dárigerleriniń aıtýynsha, aýrýǵa qarsy ekpeniń sapaly ári ýaqytynda egilýinen uzaq jyldar boıy Soltústik Qazaqstan oblysynda atalǵan aýrýǵa shaldyqqan mal tirkelmegen.
«Kóbinese jyrtqyshtar taratatyn qutyrý jáne basqa da aýrýlardyń aldyn alý maqsatynda oblys boıynsha 7 788 bas qańǵybas ıtter men mysyqtar aýlanyp, joıyldy», - dep málim etti basqarma.
Mamandar sondaı-aq, júzege asyrmas buryn mal sharýashylyǵy ónimderin de mal dárigerlik-sanıtarlyq saraptamadan ótkizedi. Mal dárigerleri 7 jospardan tys tekserý júrgizip, myńnan astam baqylaýǵa alynǵan nysandar qaraldy. Polıtsııa qyzmetkerleri men mal dárigerlik baqylaýdyń aýmaqtyq ınspektsııalary birlesip 113 reıd júrgizdi. Nátıjesinde 66 janýarlardy jáne olardan alynatyn ónimder men shıkizatty tasymaldaý erejesin buzýshylyq anyqtaldy.
«Іshki saýda nysandaryndaǵy mal dárigerlik baqylaý kún saıyn júzege asyrylady. Jyl basynan beri azyq-túlik bazarlary, mamandandyrylǵan dúkender jáne saýda úılerinde 69 quqyq buzýshylyq anyqtaldy», - dep málimdedi mal dárigerligi basqarmasy.
95 quqyq buzýshy ákimshilik jaýapkershilikke tartylyp, 2,85 mln teńge kóleminde ákimshilik aıyppul salyndy.
