SQO-da 7 myńnan astam adam ýaqytsha tirkeýge turdy
PETROPAVL. QazAqparat - SQO ákimi Petropavlǵa jasaǵan jumys sapary barysynda halyqqa qyzmet kórsetý ortalyǵyna bardy, dep habarlaıdy «QazAqparat» HAA tilshisi óńir basshysynyń baspasóz qyzmetine silteme jasap.
Erik Sultanov HQKO jumysymen jeke tanysyp, mundaǵy kezektiń kóp emes ekendigine kóz jetkizdi. Azamattardyń qajetti qyzmetti ýaqtyly alýy úshin barlyq jaǵdaılar jasalǵan.
Ýaqytsha tirkeýdi engizýge qatysty jaǵdaı týraly oblys ákimine «Halyqqa qyzmet kórsetý ortalyǵy» departamentiniń dırektory Muhamadııar Ismatov pen kóshi-qon polıtsııasy basqarmasynyń basshysy Erketaı Tutqyshev aqparattandyrdy.
Ýaqytsha tirkeýge qatysty zań jobasynyń iske qosylatyny týraly aıtylǵaly beri departamentte tirkeýdi rásimdeıtin qyzmetkerler sany kóbeıdi, sonymen qatar jumys kúni uzartyldy. HQKO kún saıyn, demalys kúnderi de tańǵy saǵat 8-den keshki 20.00-ge deıin jumys jasaıdy.
Jyl basynan beri 7 myńnan astam adam ýaqytsha tirkeýdi rásimdedi.
SQO ákimi ýaqytsha tirkeýdi áýejaıda, temir jol jáne avtovokzaldarda rásimdeıtin mobıldi top qurýdy tapsyrdy.
Keıin Erik Sultanov «Petropavl traktor zaýyty» JShS-ǵa bardy. Sondaı-aq, ol jumys barysynda «Orman» móltekaýdanyndaǵy 12 páterli turǵyn úıdi qarap shyqty. 
