SQO-da 7 myń shaqyrym joldyń bir myń shaqyrymyn qysta qar basyp qalady
PETROPAVL. QazAqparat – Soltústik Qazaqstan oblysynda bıyl qysta jergilikti mańyzy bar joldardy kútip ustaýǵa 1 mlrd teńge qarjy bólindi. Jumysty 3 uıym atqarmaq, dep habarlaıdy QazAqparat tilshisi.
SQO ákimdiginde joldardyń, olardy tazalap, qardy shyǵarýmen aınalysatyn uıymdardyń qysqa ázirligi pysyqtaldy.
Oblystyq jolaýshylar kóligi jáne avtomobıl joldary basqarmasynyń basshysy Maqsat Baıahmettiń aıtýynsha, bul jaýapty jumysqa óńir daıyn.
Al qysta joldardy qardan ýaqtyly ashý úshin bıyl 1 mlrd teńge bólindi.
«Qysta joldardy qardan tazartatyn úsh uıym bekitildi. Olar 13 aýdanǵa qyzmet kórsetedi.Tehnıkalary saqadaı saı, joldardy qys mezgilinde kútip ustaýǵa 240-qa jýyq adam, 114 tehnıka tartylady. Bul – normaǵa saı. Budan basqa basqarmanyń balansynda QR TJM memlekettik materıaldyq rezervinen alynǵan eki arnaıy tehnıka shnekorotor bar», - deıdi basqarma basshysy.
SQO-da jergilikti mańyzy bar avtojoldar jelisi 7000 km asady.
Onyń 863 km jylda qar basady, bul 266 ýchaskeni jolshylar baqylaýda ustaıdy.
Qar qursaýynda qalatyn joldardyń basym bóligi Aıyrtaý, Ǵabıt Músirepov jáne Jambyl aýdandarynda.
«Jylda Tótenshe jaǵdaılar departamentiniń daǵdarys ortalyǵynda táýlik boıy oblystyq jedel shtab jumys isteıdi. Qar basqan ýchaskeler týraly aqparat túsken jaǵdaıda oǵan jaýapty uıymnyń tehnıkasy jiberiledi. Byltyr boranǵa qatysty joldar 8 ret jabyldy. Bul onyń aldyndaǵy qyspen salystyrǵanda 5 ese az. 2020-2021 jyly qys qatty bolyp, joldy 41 ret jabýǵa týra keldi, 12 ret daýyldy eskertý jarııalandy», - deıdi Maqsat Baıahmet.
Qysta jolda qalǵandarǵa óńirde 150 orynǵa arnalǵan 6 jylytý pýnkti jumys istemek.
