SQO-da 7 qaýipti týrıstik nysan tirkeldi

PETROPAVL. KAZINFORM — Qazaqstan Respýblıkasy Tótenshe jaǵdaılar mınıstrligi ómirge qaýip tóndiretin, jetýi qıyn taýly jerlerdiń, sý aıdyndary men speleologııalyq nysandar tizbesin jasady.

Soltústik Qazaqstan oblysy tótenshe jaǵdaılar departamentiniń málimetinshe, bul tizimge 254 nysan engizilgen. Sonyń ishinde Soltústik Qazaqstan oblysy, Aıyrtaý aýdanynda ornalasqan 7 taýly aımaq bar. Olar: «Eki baýyr» shoqysy, Aqan seri tóbesi, «Býıan» shatqaly, Qazantaý taýy, Imantaý kólindegi «Jylan araly» jáne «Orlınaıa shora» shoqysy. 

— Bul jerlerdiń tabıǵaty erekshe, kórkem bolǵanymen, ásirese daıyndyqsyz kelgen týrıster úshin qaýipti bolýy múmkin. Endi osy tizimdegi baǵyttarǵa shyqpas buryn ár týrıst óz marshrýty týraly mindetti túrde habarlaýy tıis. Onyń ishinde azamattyq qorǵaý organdarynyń 112, 101, 102-nómirlerine qaı jerden shyqqany, qaıda bara jatqany, qaı ýaqytta qaıtýdy josparlap otyrǵany jóninde habarlaýǵa mindetti. Sondaı-aq sapar aldynda eQonaq mobıldi qosymshasyn júktep alǵan jón. Bul júıe tikeleı qutqarý qyzmeti bolmasa da, týrıstiń qaıda júrgenin baqylap, qajet bolǵan jaǵdaıda jedel kómek kórsetýge yqpal etedi, — deıdi departamenttiń qyzmetkeri Nursultan Tólegen.

Mamannyń aıtýynsha, sońǵy 3 jyl ishinde Aıyrtaý aýdanyndaǵy Imantaý kólinde bir qutqarý operatsııasy júrgizildi. Shoqyǵa mingen demalýshy jol taba almaı, adasyp ketken. Onyń ústine uıaly telefony tolyq otyryp qalǵan, týystaryna da, qutqarý qyzmetine de habarlasa almaǵan. Jańa talap osyndaı oqıǵalardyń aldyn alý úshin jasalyp otyr.

Qazirgi tańda jergilikti qutqarýshylar izdestirý-qutqarý jumystaryna drondardy jıi qoldanyp júr. Olar aýa raıyna qaramaı úlken aýmaqtardy sholýǵa, túnde nemese tumandy kezde joǵalǵan adamdy tabýǵa kómektesedi. 

— Saqtansań saqtaıdy. Taýǵa shyǵar aldynda júretin baǵytyńyzdy, jer bederin, aýa raıyn, sý kózderin aldyn ala zertteńiz. Jaqyndaryńyzǵa nemese qutqarýshylarǵa josparyńyz jaıynda habarlańyz, Ózińizben birge aıaq kıim, kıim, dári-dármek, kompas, karta, azyq alǵanyńyz jón. Mundaı jolǵa jalǵyz shyǵý qaýipti. Sondaı-aq baılanys quraldary — qýaty tolyq telefon, ratsııa nemese spýtnıktik maıak bolýy tıis. Jabaıy janýarlarǵa tıispeńiz, bul sizge de, olarǵa da qaýipti bolýy múmkin, — deıdi qutqarýshy.

Buǵan deıin SQO-da jedel járdem qyzmeti jańa fýnktsııa engizgenin jazǵan edik.