SQO-da 7 aıda 900-ge jýyq adamǵa travmatologııalyq ota jasaldy
PETROPAVL. KAZINFORM — Soltústik Qazaqstan oblysynda bıyl mindetti áleýmettik medıtsınalyq saqtandyrý (MÁMS) júıesi aıasynda jasalǵan travmatologııalyq otanyń jalpy quny — 287 mln teńgeden asty.
Áleýmettik medıtsınalyq saqtandyrý qorynyń oblystyq fılıalynyń málimetinshe, operatsııalardyń 461-i eresekterge, 408-i 18 jasqa deıingi balalarǵa jasalǵan.
Eresek naýqastarǵa júrgizilgen operatsııalardyń basym bóligi oblystyń medıtsınalyq uıymdarynda oryndalǵan. Sonyń ishinde kópbeıindi qalalyq jedel medıtsınalyq járdem aýrýhanasynda eresek patsıentterge 376 ota jasalǵan.
Balalarǵa jasalǵan 408 operatsııanyń 404-i kópbeıindi oblystyq balalar aýrýhanasynda oryndalǵan.
— Travmatologııalyq otalar MÁMS aıasynda jedel jáne josparly túrde júrgiziledi. Patsıentterge kórsetiletin medıtsınalyq kómek olardyń densaýlyq jaǵdaıyna jáne medıtsınalyq kórsetilimderge baılanysty uıymdastyrylady, — deıdi Áleýmettik medıtsınalyq saqtandyrý qory oblystyq fılıaly dırektorynyń mindetin atqarýshy Talǵatbek Tileýberdın.
Travmatologııa-ortopedııa salasyndaǵy kúrdeli ári qymbat operatsııalardyń qatarynda jambas jáne tize býyndaryn almastyrý otalary bar. Bıylǵy jyldyń 7 aıynda kópbeıindi qalalyq jedel medıtsınalyq járdem aýrýhanasynda mundaı 9 operatsııa jasalǵan.
Onyń 7-eýi jambas býynyn, 2-eýi tize býynyn almastyrýǵa qatysty. Bul operatsııalarǵa MÁMS arqyly jalpy 14 mln 280 myń teńge jumsaldy.
Jalpy 869 operatsııanyń ishinde synyqtar men oryn aýystyrýlardy repozıtsııalaý, ıaǵnı qalpyna keltirýge qatysty 171 ota jasalǵan. Sonymen qatar jilinshik súıekteriniń ishki fıksatsııasymen ashyq repozıtsııalaý boıynsha 49 operatsııa jáne súıekterge buryn ornatylǵan fıksatorlardy alyp tastaý boıynsha 64 ota oryndalǵan.
Mamannyń aıtýynsha, MÁMS júıesi aıasynda jasalatyn otalar saqtandyrylǵan azamattarǵa qoljetimdi. Bıyl jasalǵan operatsııalardyń ortasha quny shamamen 330 myń teńge.
Byltyr travmatologııa beıini boıynsha SQO-da 1 622 operatsııa jasalǵan. Olarǵa MÁMS aıasynda 591 mln teńgeden astam qarajat jumsalǵan.
Buǵan deıin Qyzylordada moıyn omyrtqasyna alǵash ret kúrdeli ota jasalǵanyn jazǵan edik.
