SQO-da 7 astyq saqtaý qoımasy men tuqym shyǵaratyn zaýyt salynady

NUR-SULTAN. QazAqparat – Soltústik Qazaqstan oblysynda 7 astyq saqtaý qoımasy men tuqym shyǵaratyn zaýyt salynyp jatyr. Bul týraly Soltústik Qazaqstan oblysynyń ákimi Qumar Aqsaqalov Ortalyq kommýnıkatsııalar qyzmetindegi baspasóz máslıhatynda aıtty, dep habarlaıdy QazAqparat tilshisi.

«Aýyl sharýashylyǵy salasynda bıyl ınvestıtsııa kólemi 140 mıllıard teńgege jetpek. Qazaqstandaǵy agroınvestıtsııanyń tórtten biri bizdiń oblystyń úlesinde. Bıyl agroónerkásip salasynda 48 mlrd teńgege 34 joba júzege asýda. Maıly daqyldardyń alqabyn ulǵaıtý boıynsha aýqymdy jumys júrgizildi. Táýelsizdik alǵan jyldary oblysta maıly daqyldar 51 myń gektarǵa sebilse, qazir onyń kólemin 1 mln gektarǵa deıin jetkizdik. Endi maıly daqyldardy qaıta óńdeý jumysyn qolǵa aldyq», - dedi ol.

Qumar Aqsaqalovtyń dereginshe, qazir oblysta maıly daqyldardy óńdeıtin Qazaqstandaǵy eń qýatty zaýyt salynýda. Ol jylyna 370 myń tonna maıly daqyldardy óńdeı alady.

«Oblysqa 15 mlrd teńge ınvestıtsııa tartylady. 200-den astam turaqty jumys ornyn ashý josparlanýda. Jańa kásiporyn oblystaǵy maıly daqyldardyń 90 paıyzyn óńdeýge múmkindik beredi. Óńirde 7 astyq saqtaý qoımasy men tuqym shyǵaratyn zaýyt salynýda. 3 myń tonnaǵa jýyq kókónis óndiretin jylyjaıdyń qurylysy bastaldy», - dedi óńir basshysy.