SQO-da 670 myń ga jer memleket menshigine qaıtaryldy
Petropavlda óńirlik kommýnıkatsııalar qyzmetinde SQO ákiminiń birinshi orynbasary Marat Tasmaǵanbetovtiń qatysýymen brıfıng ótti. Aýyl sharýashylyǵy salasynyń qazirgi jaı-kúıi áńgime bolǵan kezdesýde ıgerilmeı bos jatqan alqaptar máselesi kóterildi.
SQO-nyń qazirgi jer aýmaǵy 9,8 mln ga bolsa, onyń 7,2 mln ga aýyl sharýashylyǵynda qoldanylady. Sonyń 5 mln ga jýyǵy egis alqaptary, qalǵan 2 mln ga jýyǵy jaıylymdyq jerler.
Jerdi tıimdi paıdalaný maqsatynda sońǵy tórt jylda sharýashylyqtardan ıgerilmeı jatqan 670 myń ga májbúrli túrde memleketke qaıtaryldy. Bul – 101 sharýashylyqtyń alqaby. Máselen, tek Taıynsha aýdanyndaǵy «Bogvı» JShS-nen ǵana 37 myń ga jer alynǵan.
«Sot arqyly aýmaǵy 11 myń gektardy quraıtyn 61 ýchaske memleketke qaıtaryldy. Taǵy 480 myń gektar alqapty qaıtarý boıynsha jumystar júrgizilip jatyr. Aýyl sharýashylyǵy mınıstrliginiń bastamasymen osy máselege qatysty jańa zań jobasy ázirlendi. Bos jatqan alqap anyqtalatyn bolsa burynǵydaı eki jyldy kútýdiń qajeti joq, jer 1 jyldyń kóleminde memleket menshigine ótedi. Sondaı-aq sharýashylyqtar ózderine senip tapsyrylǵan alqaptardy tıimdi paıdalanbasa, ıaǵnı az ónim alatyn bolsa - memlekettik sýbsıdııalardan qaǵylady», - dedi SQO ákiminiń birinshi orynbasary Marat Tasmaǵanbetov.
SQO jer ınspektsııasy basqarmasy bıyl 300-den astam tekseris júrgizip, jartysynan astamynda jerdiń tıisinshe ıgerilmeı jatqanyn anyqtady. Nátıjesinde bes myńnan astam ga aýylsharýashylyq jeri kelisimsharttardy buzý arqyly, 10 myńnan astam ga sot arqyly memleket menshigine qaıtaryldy. Bul jumystar aldaǵy jyly jalǵasyn tappaq.
