SQO-da 66 eldimeken turǵynyn avtobýspen qamtý úshin 270 mln teńge demeýqarjy bólingen

PETROPAVL. QazAqparat – Soltústik Qazaqstan oblysynda tasymaldaýshylar úshin tıimsiz baǵyttarǵa avtobýstar jiberý úshin bıyl 270 mln teńge sýbsıdııa bólindi, dep habarlaıdy QazAqparat tilshisi.

Memlekettik qyzmet jaıynda óńirlik kommýnıkatsııalar qyzmetinde ótken brıfıngte SQO Jolaýshylar kóligi jáne avtomobıl joldary basqarmasy basshysynyń mindetin atqarýshy Asqat Bakeev aıtyp berdi.

Basqarma 4 memlekettik qyzmet túrin kórsetedi. Solardyń ishindegi suranysqa ıesi - oblys, aýdanaralyq áleýmettik mańyzy bar baǵyttar boıynsha tasymaldaýshylardyń shyǵyndaryn sýbsıdııalaý. ıAǵnı shalǵaı jatqan, joldary nashar aýyldarǵa avtobýs baǵyttaryn ashyp, tasymaldaýshylardyń shyǵyndaryn óteý.

«Kóptegen eldi mekenderde alys bolǵandyqtan jáne sapasyna baılanysty avtobýs qatynasy joq, sondyqtan halyqty qoljetimdi kólikpen qamtamasyz etý úshin osyndaı qyzmet engizildi. Byltyr bul qyzmetti 84 tasymaldaýshy paıdalandy. Bıyl pandemııaǵa baılanysty eki aı kólik qatynasy úzildi. Ázirge bul qyzmetti 24 tasymaldaýshy paıdalandy», - deıdi Asqat Bakeev.

SQO Jolaýshylar kóligi jáne avtomobıl joldary basqarmasy baspasóz qyzmetiniń málimetinshe, byltyr 8 baǵytqa 117 mln teńge demeýqarjy berilgen. Bıyl 10 baǵytqa jergilikti qazynadan 270 mln teńge bólindi. Nátıjesinde 66 eldimeken turǵyndary reıstik avtobýstarmen qamtyldy. Jyl sońyna deıin áleýmettik mańyzy bar taǵy eki baǵyt boıynsha qoǵamdyq kólik jiberý josparlanǵan.