SQO-da 65 jastan asqandardyń kóshege shyǵýyna shekteý qoıyldy
PETROPAVL. QazAqparat – Soltústik Qazaqstan oblysynda karantındik sharalar kúsheıtilip, kóptegen kóńil kóterý, sporttyq nysandardyń jumysyna shekteý qoıylmaq, dep habarlaıdy QazAqparat tilshisi.
SQO-da óńirdiń bas sanıtarlyq dárigeriniń jańa qaýlysy shyǵyp, qujat 20 maýsym saǵat 00.00-den bastap kúshine enbek.
Erteńnen bastap oblysta túngi klýbtardyń, balalardyń saýyqtyrý lagerleriniń, mektep janyndaǵy lagerlerdiń, kóńil kóterý oryndarynyń, sonyń ishinde karaoke, bılıard, kompıýterlik klýbtar jáne boýlıng-ortalyqtardyń jumysy toqtatylady.
Fıtnes, trenajer zaldary, sport keshenderi men basseınderdiń, akvaparkter ýaqytsha jabylady. Sondaı-aq taza aýadaǵy qoǵamdyq oryndar: saıabaqtar, skverler, attraktsıondar jumysy toqtaıdy.
Halyqqa qyzmet kórsetý ortalyǵy tolyq onlaın formatqa kóshirilgenimen, qashyqtan alýǵa bolmaıtyn qyzmetter saǵat 9.00 men 20.00 aralyǵynda kórsetiletin bolady.
Týrızm nysandary jumys isteı bermek, alaıda ondaǵy adam sany tıisti mólsherden aspaı, kelýshiler áleýmettik ara qashyqtyqty saqtaýǵa mindetti.
Sondaı-aq, erteńnen bastap jasy 65-ten asqandardyń kóshege shyǵýyna shekteý qoıylmaqshy.
