SQO-da 63 ata-ana balasy úshin ákimshilik jazaǵa tartyldy
PETROPAVL. QazAqparat – Soltústik Qazaqstan oblysynda 63 ata-ana túnde beısaýat júrgen balalary úshin jaýap berip, ákimshilik jaza tartty, dep habarlaıdy QazAqparat tilshisi.
SQO Polıtsııa departamenti baspasóz qyzmetiniń málimetinshe, óńirde «Bala eńbegin qanaýǵa qarsy 12 kún» ulttyq aqparattyq naýqany máresine jetti. Respýblıkalyq aktsııa 1 maýsym kúni bastaldy. Tártip saqshylary Bilim basqarmasynyń mamandarymen birge 265 reıd ótkizdi. Nátıjesinde 400 jýyq nysan tekserildi.
«Birinshi kezekte jaz maýsymynda aqsha tabý maqsatynda jasóspirimder arasynda suranysqa ıe jazǵy dámhanalar, bazarlar men saýda pavılondary tekserildi. Jasóspirimderge qatysty zańbuzýshylyq derekteri anyqtalǵan joq. Kásipkerlermen profılaktıkalyq áńgime júrgizildi. Olarǵa jasóspirimderdi jumysqa alý tártibi túsindirildi. Sondaı-aq balalarǵa qatysty eńbek zańnamasyn buzǵan jaǵdaıda qoldanylatyn jaza jaıynda aıtyldy», - deıdi tártip saqshylary.
Máselen, jasóspirimdi oǵan isteýge bolmaıtyn jumysqa alǵan jaǵdaıda jumys berýshi 2 myń AEK mólsherinde aıyppul tóleıdi nemese eki jylǵa deıin bas bostandyǵynan aıyrylýy múmkin.
«Zań boıynsha jasóspirim jumys isteýge quqyly. Biraq onyń 18 jasqa deıin túnde jáne aýyr kúsh qajet etetin jumysta isteýine tyıym salynǵan. Sondaı-aq atqarǵan jumysy oqý protsesine áser etpeýi kerek. 14 jastan 16 jasqa deıin jasóspirim aptasyna 24 saǵatqa deıin, 16 jastan 18 jasqa deıin 36 saǵattan artyq jumys isteı almaıdy. Eńbek kelisimshartyna ata-ananyń bireýi qol qoıýy qajet. Sondaı-aq eresekterdi kelisimshartqa qol qoıýmen shektelip qalmaı, balanyń jumys ornymen, jasalǵan jumys jaǵdaıymen tanysýǵa keńes beremin», - deıdi SQO Polıtsııa departamenti bastyǵynyń birinshi orynbasary Qanat Aıtbaev.
Respýblıkalyq aktsııa aıasynda tártip saqshylary «Túngi qaladaǵy balalar» atty reıdter uıymdastyrdy. Kóńil kóterý oryndary tekserildi. Bul jerlerde jumys istegen bala anyqtalmasa da, óz betimen demalýǵa kelgen jasóspirimder tabyldy. Nátıjesinde, 63 ata-ana balasynyń túnde kóshede jáne kóńil kóterý oryndarynda júrgeni úshin jaýap berdi.
