SQO-da 61 myń adamǵa tumaýǵa qarsy vaktsına egildi
PETROPAVL. QazAqparat – Soltústik Qazaqstan oblysynda jedel respıratorlyq vırýstyq ınfektsııany juqtyrǵandar sany artty. Bir aptada 875 adam medıtsınalyq kómekke júgingen, dep habarlaıdy QazAqparat tilshisi.
SQO taýarlar men kórsetiletin qyzmetterdiń sapasy men qaýipsizdigin baqylaý departamenti baspasóz qyzmetiniń málimetine qaraǵanda, bıyl ótken jyldyń osy kezeńimen salystyrǵanda aýrýdy juqtyrý 19% tómen bolǵanymen, ótken aptadaǵy kórsetkishten 7% artqan. ıAǵnı kúnniń sýytýymen sýyq tıgender sany artyp keledi. Aýrýdy juqtyrǵandardyń negizgi úlesin - 72% 14 jasqa deıingi balalar quraıdy.
Vırýsologııalyq zertteýlerdiń nátıjeleri boıynsha Petropavl qalasynda tumaýmen aýyrýdyń bir jaǵdaıy anyqtaldy. Syrqattan «V» tıpti tumaý vırýsy tabyldy.
«1 qazannan 1 jeltoqsanǵa deıin oblysta tumaýǵa qarsy vaktsına egý jumystary júrgizildi. Vaktsınatsııa tumaýdyń saldarynan bolatyn aýyr asqynýlarǵa jol bermeıdi. 1 qazannan 15 qarashaǵa deıin oblys turǵyndarynyń 10,9%, 60 myń 965 adam tumaýǵa qarsy egildi, onyń 17 myń 408 bala. Jergilikti bıýdjet esebinen 60 myń adam egilse, qalǵany ekpeni aqyly negizde aldy», - deıdi SQO taýarlar men kórsetiletin qyzmetterdiń sapasy men qaýipsizdigin baqylaý departamentiniń baspasóz hatshysy Aınash Saǵyndyqova.
Tumaý vırýsy aýrý adamnan jótel jáne túshkirgende aýa-tamshy jolymen, sondaı-aq jalpy paıdalaný zattary arqyly juǵady. Ádette jedel respıratorlyq vırýstyq ınfektsııa adamda jeńil ótedi, al tumaýda dene qyzýy birden 39-40°S deıin kóterilip, qaltyraıdy, jótel paıda bolyp, álsizdik, bas aýyrýy, bulshyq et pen býyndardyń aýyrýy mazalaıdy.
Sýyq tııý men tumaýdan qorǵaný úshin mamandar qoldy únemi sabynmen jýyp, bólmeni jeldetip otyrý qajettigin jáne salamatty ómir saltyn ustanyp, sportpen shuǵyldaný kerektigin aıtady. Sondaı-aq dárigerler aýrýdyń alǵashqy belgileri paıda bolǵan kezde ýaqytyly medıtsınalyq kómekke júginýdi jáne ózin-ózi emdeýge bolmaıtyndyǵyn eskertedi.
