SQO-da 600-ge jýyq referendým ýchaskesi qurylǵan

PETROPAVL. KAZINFORM – Soltústik Qazaqstan oblysynda 15 naýryzda ótetin respýblıkalyq referendýmda 596 referendým komıssııasy jumys isteıdi.

Mańyzdy is-shara qarsańynda oblys aýmaǵynda aýqymdy uıymdastyrý jumystary qolǵa alyndy.

SQO aýmaqtyq referendým komıssııasynyń málimetinshe, jalpy óńir boıynsha 596 referendým komıssııasy jumys istese, onyń 15-i – aýmaqtyq, al 581-i – ýchaskelik referendým komıssııalary bolmaq. 

- Oblys kóleminde barlyǵy 581 referendým ýchaskesi qurylǵan. Eń kóp – 98 ýchaske Petropavlda, eń azy – 25 ýchaske Aqqaıyń aýdanynda ornalasady. Komıssııa quramynda 3 myńnan astam adam eńbek etedi. Olar daýys berý protsesiniń zań talaptaryna sáıkes ári ashyq ótýin qamtamasyz etedi.

Sondaı-aq, referendýmdy uıymdastyrý men ótkizý barysy qoldanystaǵy zańnama talaptaryna sáıkes júzege asyrylady, - dedi SQO aýmaqtyq referendým komıssııasynyń ókilderi.

Daýys berýge quqyly azamattardyń naqty sany týraly málimetti jergilikti atqarýshy organdar 22 aqpanda jarııalaıdy.

Buǵan deıin Konstıtýtsııa jobasyna qatysty referendým qorytyndysy 21 naýryzǵa deıin jarııalanatyndyǵyn jazǵan edik.