SQO-da 600-den astam qarý joıyldy
PETROPAVL. QazAqparat – Soltústik Qazaqstan oblysynda polıtseıler bir jyl boıy tárkilengen, jurt tapsyrǵan jáne tabylǵan 600-den astam qarýdy joıdy, dep habarlaıdy QazAqparat tilshisi.
SQO polıtsııa departamenti baspasóz qyzmetiniń málimetinshe, polıtseıler jylyna bir ret qarý joıý aktsııasyn ótkizedi. Bul negizinen jedel-aldyn alý is-sharalary kezinde tárkilengen qarý-jaraq. Joıylǵanǵa deıin olar arnaıy jabdyqtalǵan nysanda saqtalady. Keıin tyl jaǵynan qamtamasyz etý basqarmasynyń mamandary qarýlardy atýǵa jaramsyz etip, jáshikterge salady. Al jáshikter arnaıy kúzetpen oblys kásiporyndarynyń birine jetkiziledi.
Qarý-jaraq salynǵan jáshikter komıssııa músheleriniń kózinshe ashyldy. Onyń barlyǵy úzdiksiz beınekameraǵa túsirildi. Keıin qarý bolat balqytatyn peshke jóneltildi.
«Osy joly 627 qarýdy joıdyq. Peshte balqytýǵa 8 saǵat ýaqyt ketti. Shara basynan sońyna deıin komıssııa músheleriniń kózinshe ótti. Óıtkeni ár qarý qatań esepte boldy. Bul aktsııa polıtseılerdiń zańsyz qarýdy anyqtap, tárkileý boıynsha bir jyl boıy júrgizgen eńbeginiń qorytyndysy. Zańsyz qarý-jaraqty joıý, onymen jasalatyn qylmysty tómendetedi. Turǵyndardy taǵy bir márte eskertkim keledi, úıde zańsyz saqtalǵan qarýdy óz erkimen tapsyrý arqyly ákimshilik jazadan qutylýǵa bolady», - deıdi SQO PD bastyǵynyń orynbasary Aıdos Ydyrysov.
