SQO-da 6 karantın beketi ashyldy
PETROPAVL. QazAqparat – Soltústik Qazaqstan oblysyndaǵy Taıynsha, Aıyrtaý, Aqjar, Ýálıhanov jáne Jambyl aýdandarynda búgin alty karantın beketi jumysyn bastady, dep habarlaıdy QazAqparat tilshisi.
SQO Polıtsııa departamenti baspasóz qyzmetiniń málimetinshe, karantın beketterinde patrýldik polıtsııa jáne kóshi-qon qyzmetiniń mamandary avtokólik quraldary, júrgizýshiler jáne jolaýshylar legine baqylaý júrgizedi.
«Koronavırýs ınfektsııasynyń taralýyna jol bermeý maqsatynda azamattarymyzdyń qaýipsizdigi men densaýlyqtaryn saqtaýdy qamtamasyz etýge baǵyttalǵan májbúrli sharalar qabyldanýda. Oblystyq jedel shtabtyń tapsyrmasy boıynsha karantın beketteri ashylǵan. Búginde pandemııamen kúres júrgizetin barlyq qyzmetterdiń is-áreketin úılestirý boıynsha jumystar júrgizilip jatyr. Óńirge kiretin azamattar týraly málimetter bazasy júıelenýde», - dedi SQO Polıtsııa departamentiniń bastyǵy Marat Tólebaev.
Beketterde polıtseılermen qatar medıtsına qyzmetkerleri de kezekshilik atqarady. Bul jerde júrgizýshiler men jolaýshylar saýalnamadan ótedi. Ondaǵy maqsat jol júrgen azamattar týraly derek alý.
«Іs-sharalardy ótkizý kezinde tártip saqshylary medıtsına qyzmetkerlerine tolyq kómek kórsetýi tıis, ádep saqtaı otyryp, atalǵan sharalardyń qajettiligi týraly sabyrlyqpen túsindirýi qajet. Bul jumysqa túsinistikpen qaraǵan barlyq azamattarǵa alǵys bildiremiz. Osyndaı jumystar halyq tarapynan qoldaý tapqanda ǵana óz nátıjesin beredi», - dedi oblystyq vedomstvo basshysy.
Karantın beketteriniń biri Taıynsha aýdanyndaǵy Kellerovka eldi mekeninde ashyldy. Bir kúnniń ózinde «Kellerovka» karantın beketi arqyly 40 avtokólik quraly ótti.
Taıynsha aýdandyq ishki saıasat bóliminiń málimetine qaraǵanda, patrýldik polıtsııa jáne kóshi-qon qyzmetiniń mamandary, medıtsınalyq qyzmetkerler úsh aýysymda 8 saǵattan jumys isteıdi. Ár beket bir aýysymda 20-50 kólikti baqyladan ótkizedi. Jalpy, Taıynsha, Aıyrtaý, Aqjar, Ýálıhanov jáne Jambyl aýdandarynda búgin alty karantın beketi jumysyn bastady.
