SQO-da 58 jastaǵy er adam segiz kúnnen beri tabylmaı jatyr
PETROPAVL. QazAqparat – Soltústik Qazaqstan oblysynda Smırnovo eldi mekeniniń 58 jastaǵy turǵynyna izdeý jarııalandy. Petropavlǵa jumystarymen ketken er adamnan segiz kúnnen beri habar joq, dep habarlaıdy QazAqparat tilshisi.
SQO polıtsııa departamenti baspasóz qyzmetiniń málimetinshe, Aqqaıyń aýdany polıtsııa bólimine 26 sáýirde Smırnovo aýylynyń turǵyny 58 jastaǵy ákesiniń joǵalǵany jaıly habarlaǵan. Qyzynyń aıtýynsha, er adam 20 sáýir kúni «ZıL» kóligine qosalqy bólshek alý úshin Petropavl qalasyna ketken. Sol ýaqyttan beri odan habar bolmapty.
Joǵalǵan er adamnyń dene bitimi aryqsha kelgen, boıy 160-165 sm, shashy qara qońyr, qysqa, shashy men murtyn aq shala bastaǵan, kózi qońyr tústi, oń qolyndaǵy bileginde týa bitken dóńgelek pishindi meńi bar. Úıinen ketken kezde basynda fýrajka, ústinde uzyn qara kýrtka, qara shalbar bolǵan. Moınyna kresi bar sary tústi alqa taǵyp júrgen.
«Smırnovo aýylynyń turǵynyn izdeýge jeke quram men polıtsııanyń keshendi kúshteri, beınebaqylaý ınspektorlary baǵdarlandy. Volonterler de kómektesip jatyr. Іz-tússiz joǵalǵan adam týraly habarlama áleýmettik jelilerge ornalastyryldy. Krımınaldyq polıtsııa qyzmetkerleri onyń bolýy múmkin jerlerdi tekserip jatyr», - deıdi SQO PD KPB bólim bastyǵy Seıilhan Jumaǵulov.
Polıtseılerdiń aıtýynsha, joǵalǵan adam týraly tolyq málimetti, onyń tanystary men ádetteri jaıly bilý mańyzdy. Mysalǵa, izdeýdegi adamnyń ishimdikti asyrý paıdalanýǵa beıim bolýy, bul birden atalǵan sanattaǵy adamdardy tartatyn kóńil kóteretin jáne basqa da oryndardy nazarǵa alyp, izdeýge baǵyt beredi. Іz-tússiz joǵalǵannyń este saqtaý qabiletinen aıyrylýy qıyndyq týǵyzatyn jaǵdaı, onyń júrgen jerin anyqtaý asa qıynǵa soǵady.
Jyl basynan polıtsııaǵa SQO turǵyndarynan adamdardyń iz-tússiz joǵalýymen baılanysty 124 ótinish kelip tústi. Onyń ishinde 118 joǵalǵan kezekshi táýlikte tabylyp, taǵy beseýin izdeýge ýaqyt qajet boldy, bireýi áli tabylǵan joq.
