SQO-da 570 turǵynǵa KT men MRT tegin jasaldy
«ÁMSQ» SQO boıynsha fılıalynyń baspasóz qyzmetiniń málimetinshe, jaldanyp jáne aýysymmen jumys isteıtin qyzmetkerler jumys berýshileriniń MÁMS júıesi aıasynda olar úshin aqsha aýdarǵanyn qadaǵalap, óziniń saqtandyrý mártebesin anyqtaǵany jón.
1 sáýirden bastap saqtandyrylmaǵan azamattar MÁMS paketine engen magnıttik-rezonanstyq, kompıýterlik tomografııadan, qymbat turatyn zertteý men operatsııalardan, sondaı-aq TMKKK tizbesine kirmeıtin aýrýlar kezinde josparly statsıonarlyq, statsıonar almastyrǵysh kómek sııaqty medıtsınalyq qyzmetten qaǵylady.
Qańtar aıynyń qorytyndysy boıynsha oblystyń 570 turǵynyna magnıtti-rezonansty jáne kompıýterlik tomografııa tegin jasalǵan. Osy maqsatqa qordan 8 mln teńge jumsaldy. Byltyr osy aralyqta bul qyzmetti oblystyń 72 turǵyny ǵana alǵan edi.
Medıtsınalyq kómektiń tolyq kólemin alý úshin sońǵy úsh aıda qorǵa jarna aýdarýy tıis. Óz qyzmetkerleri úshin jumys berýshiler aýdarym jasaıdy. Ózin-ózi jumyspen qamtyǵandar búginde barlyq emhanalarda, kópbeıindi aýrýhanalardyń statsıonarlarynda ornalastyrylǵan termınaldarda, sondaı-aq ekinshi deńgeıdegi bankterde, «Qazposhta» AQ bólimshelerinde jáne mobıldik qosymshalar arqyly ózderi tólem jasaıdy.
Oblysta sońǵy bir jylda 166 300 adam qorǵa aýdarym jasady. Alaıda olardyń 22 myńnan astamynyń MÁMS paketi sheńberinde medıtsınalyq kómekti almaý qaýpi bar. Óńirdegi 1 314 kásiporyn jáne tórt myńnan astam jumys berýshi tıisti tólemdi turaqty aýdarmaı otyr.
Byltyr 24,5 myń salyq tóleýshiden 3 mlrd jýyq teńge MÁMS úshin jarna túsken. 2020 jylǵy 31 qańtardaǵy bereshek 35 mln teńgeni quraǵan, onyń ishinde 558 zańdy tulǵa 29 mln teńge jáne 756 jeke kásipker 6 mln teńge qaryz. Bereshektiń negizgi úlesi - 68% ınvestorlarmen jumys isteıtin kásiporyndarǵa tıesili, 24 mln teńgeni quraıdy.
