SQO-da 55 eldi meken tórt kún boıy jaryqsyz otyr
Soltústik Qazaqstan oblysynda borannyń saldarynan elektr qýatynsyz qalǵan eldi mekenderdiń sany 183-ten 55-ke deıin qysqardy. Energetıkter 22 qarasha saǵat 15.00-ge deıin qalǵan aýyldarǵa jaryq berýdi josparlap otyr, dep habarlaıdy Kazinform.
SQO Energetıka jáne turǵyn úı-kommýnaldyq sharýashylyǵy basqarmasy basshysynyń mindetin atqarýshy Vladıslav Lýkınniń málimetine súıensek, 18 qarasha kúni oblysta 183 eldi meken jaryqsyz qaldy. Ásirese Maǵjan Jumabaev aýdanynda jaǵdaı nashar boldy. Magıstraldy jeliniń tireýishi qulady. Bul aýdan elektr qýatynan tolyq ajyratyldy.
«Elektr jelileri «Sevkazenergo» AQ menshigi, kompanııanyń kómegimen eldi mekenderge elektr qýaty berilip jatyr. 46 brıgada qurylǵan bolatyn. 183 tehnıka jumyldyryldy. Qazirgi ýaqytta 7 aýdannyń 55 eldi mekeninde jaryq joq. Olar – M.Jumabaev, Aqqaıyń, Tımırıazev, Esil, Shal aqyn, Qyzyljar jáne Taıynsha aýdandary. Energetıkterdiń habarlaýynsha, erteń kúndizgi saǵat 15.00-ge deıin barlyq eldi mekender elektr qýatyna qosylady», – deıdi Vladıslav Lýkın.
Másele týyndasymen-aq oblystyq ákimdik basshylyǵynyń qatysýymen shtab qurylyp, jumys jospary jasaldy.
«Biz áleýmettik nysandarda jylytý júıesiniń qatyp qalmaýyn negizgi mindet etip aldyq. Olar birden rezervti qýat kózine qosyldy. ıAǵnı ortalyq qazandyqpen jylytylatyn mektepterdiń, emdeý mekemeleri men turǵyn úılerdiń jylytý júıesi qatqan joq.
Óńirdi sýmen qamtyp otyrǵan «Esil sý» fılıaly da kúsheıtilgen tártipte jumys istep jatyr. Sý táýlik boıy bolmasa da, kúnine birer saǵatqa berilýde», – deıdi Vladıslav Lýkın.
Mamannyń aıtýynsha, basty qıyndyq – elektr jelisindegi apat ornyn tabýda. Tabylǵan jaǵdaıda brıgada táýlik boıy jumys isteı alady. Al tehnıka qaýipsizdigi talabyna saı, olar apat ornyn belgili bir keshki ýaqytqa deıin ǵana izdeı alady, odan keıin qaýipti, mamandar jumysty toqtatýy tıis. ıAǵnı úzilgen, isten shyqqan elektr jelilerin anyqtaý uzaq ýaqytty alyp jatyr.
«Jalpy óńirde elektr jabdyqtary eskirgen, bul oblys ákiminiń baqylaýynda. «Sevkazenergo» AQ birge jylý, elektrmen jabdyqtaýda qaýipti aýmaqtar anyqtaldy. Kompanııamen birge bul ýchaskelerdi jańǵyrtatyn bolamyz. Memlekettik baǵdarlamalardyń aıasynda qalpyna keltiremiz, bir bóligin «Sevkazenergo» jónge keltiredi. Qazirgi ýaqytta elektr jelileriniń 95% tozyǵy jetken», – deıdi Vladıslav Lýkın.
Esterińizge salaıyq, 18 qarasha kúni SQO-da jańbyr jaýyp, arty qarǵa ulasty, boran turdy. Jeldiń ekpini sekýndyna 25 metrge deıin jetti. Saldarynan muz qatqan elektr symdary shydamaı, úzildi. Mamandar onyń saldarymen áli kúresip jatyr.
