SQO-da 54 jastaǵy áıel óz úıinde janyp ketti
PETROPAVL. QazAqparat – Soltústik Qazaqstan oblysynda túnde 40 mınýttyq aıyrmashylyqpen ártúrli aýyldardaǵy eki turǵyn úı órtendi, dep habarlaıdy «QazAqparat» HAA tilshisi.
Jergilikti jerdiń Tótenshe jaǵdaılar departamentiniń baspasóz qyzmetiniń habarlaýynsha, bir-birinen 14 km qashyqtyqta ornalasqan Aqqaıyń aýdanynyń Smırnovo jáne Qaratomar aýyldarynda órt bolǵan.
«Túngi saǵan 02:00 shamasynda Qaratomar aýylyndaǵy úıde bolǵan órt týraly aqparat kelip tústi. Oqıǵa ornyna barǵan órt sóndirýshiler órtti tolyǵymen sóndirgen. Qosymsha kúshter qajet bolyp, TJ ornyna órt sóndirý brıgadasy bar ekinshi kólik kelgen. Dál osy ýaqytta Smırnovo aýylyndaǵy úıde bolǵan órt týraly habar kelip túsedi. Qyzyljar aýdanynyń Beskól aýdan ortalyǵynan bekitilgen quramdy shaqyrýǵa týra keldi. Kórshiler úıdiń ishinde 54 jastaǵy áıeldiń bar ekenin aıtqan. Keıin onyń denesi tabyldy», - dep habarlady Departament basshysynyń orynbasary Nurlan Atyǵaev.
Eki úı de tolyǵymen janyp ketken. N.Atyǵaev eki jaǵdaıda da órt týraly habar úıler ashyq janyp jatqan kezde kesh kelip túskenin atap ótti.
Jyl basynan beri aýdanda 509 órt oqıǵasy tirkelgen. Olardyń kóbisi turǵyn úılerde bolǵan. Órt saldarynan 33 adam qaza tapsa, 25-i jaraqat alǵan.
Qutqarýshylardyń aıtýynsha, órttiń kóp sebebi adam faktorynan bolady eken: elektr jabdyqtaryn ornatý jáne tehnıkalyq paıdalaný erejelerin buzý, peshterdi qoldaný kezinde órt qaýipsizdigi erejelerin saqtamaýy.
