SQO-da 530 adamnyń qos azamattyǵy bary anyqtaldy
PETROPAVL. QazAqparat - Jol qozǵalysy men kóshi-qon jaǵdaıyn jaqsartý týraly ózekti máseleler SQO ІІD konsýltatıvtik-keńesshi organynyń otyrysynda qaraldy, dep habarlaıdy «QazAqparat» HAA tilshisi vedomstvonyń baspasóz qyzmetine silteme jasap.
Ákimshilik polıtsııa basqarmasynyń bastyǵy Dáýren Qazbekov jol ınfraqurylymyn jaqsartý boıynsha qoldanystaǵy sharalar týraly aıtty. Jyldyń basynda 204 jol kólik apaty tirkelse, bul kórsetkish byltyrǵy jylmen salystyrǵanda 14%-ǵa azaıǵan. 670-ten astam tas joldy tekserý júzege asyrylyp, nátıjesinde kemshilikterdi túzetýge 576 nusqama berildi. Qys mezgilinen beri polıtsııa men atqarýshy organdar jol kútimin qadaǵalaıtyn laýazymdy tulǵalardy ákimshilikke jaýapqa tartty. KKO músheleri bul máseleni kelesi jyldyń basynda múddeli vedomstvalardyń qatysýymen qaraıdy.
Kóshi-qon jaǵdaıynyń baqylanýy týraly kóshi-qon polıtsııasynyń bastyǵy Erketaı Týtkýshev aıtyp berdi. Jyldyń basynan beri oblysta eńbek ımmıgranttaryna 2 myń ruqsatnama berilgen, 20 myńnan astam shetel azamattary ýaqytsha tirkelgen. Qazaqstan azamattyǵyn 178 adam, onyń ishinde 74 oralman aldy. Kóshi-qon zańnamasyn buzǵan 3140 sheteldik anyqtalyp, 49 qylmystyq is qozǵaldy. Oblysta qos azamattaǵy bar 530 adam anyqtalyp, 80 adam ákimshilik jaýapqa tartyldy.
Konsýltatıvtik-keńesshi organynyń otyrys nátıjesin SQO ІІD bastyǵy Berik Bilálev jedel-qyzmettik is-áreket kórsetkishterin málimdep, qorytyndylady.
