SQO-da 51 adamnyń atyna zańsyz nesıe resimdegen shymkenttik sottaldy
PETROPAVL. QazAqparat – Soltústik Qazaqstan oblysynda bıyl 541 ınternet alaıaqtyq qylmysy jasaldy, bul ótken jyldyń osy kezeńimen salystyrǵanda shamamen eki esege kóp, dep habarlaıdy QazAqparat tilshisi.
SQO óńirlik kommýnıkatsııalar qyzmetinde «Alaıaqtyqtyń zamanaýı túrleri» taqyrybynda brıfıng ótti. SQO PD krımınaldyq polıtsııa basqarmasynyń bastyǵy Marat Jumalıevtiń aıtýynsha, bıylǵy 9 aıda 541 ınternet alaıaqtyq tirkeldi, byltyr osy kezeńde 294 qylmys jasalǵan.
«Ádette, mundaı jaǵdaılardyń barlyǵynda qylmyskerler bizdiń respýblıkamyzdyń basqa aımaqtarynda nemese kórshi memleketterde turady. Bıyl tirkelgen faktilerdiń 130 jaǵdaıynda kúdiktiler elimizdiń basqa óńirlerinde, al 172 jaǵdaıda basqa elderde bolǵan. Internet alaıaqtyq respýblıkanyń barlyq aýmaǵynda ósken jáne jyl saıyn is júzinde 2 esege kóbeıip otyr. Negizgi boljamdy sebepter ınternet jelisinde saýda-sattyqtyń damýy, qolma-qol tólemnen halyqtyń bas tartýy, sondaı-aq halyqtyń aqparattyq saýatsyzdyǵy», - deıdi Marat Jumalıev.
Óńirde negizinen bank qyzmetkeri bolyp qońyraý shalý, tanymal jarnama saıttarynda taýarlarǵa tapsyrys qabyldaý, qysqa ýaqyt ishinde qarajatty kóbeıtýge ýáde berý sekildi alaıaqtyq keń taraǵan. Feıktik habarlamalardy anyqtaý maqsatynda ınternet keńestigine monıtorıng júrgizilip, 1027 habarlama tekserilgen, 91-i buǵattaldy. SQO-nyń 88 655 turǵynyna statsıonarlyq jáne mobıldi telefondar arqyly ınternet jelisindegi alaıaqtyq týraly aýdıojazba joldanǵan.
«Almatyda 32 jastaǵy esh jerde jumys istemeıtin Qaraǵandy oblysynyń týmasy ustaldy, ol Olh saıtynda avtokólikterge qosalqy bólshekterdi tómen baǵamen jetkizý týraly feık habarlandyrý jarııalaǵan. Onyń quryǵyna 40 adam ilikken. Qazirgi ýaqytta qylmystyq is sotta qaralyp jatyr. Shymkentte ınternet jelisinde jarııalanǵan qujattardyń fotosýretterin paıdalanǵan 32 jastaǵy er adam ustaldy, ol adamdarǵa mıkroqarjy uıymdarynda onlaın-nesıe resimdegen. Alaıaqtyqtyń 51 faktisi anyqtaldy. Qylmysker 4 jylǵa bas bostandyǵynan aıyryldy», - deıdi basqarma basshysy.
