SQO-da 500 tonnaǵa jýyq qıyrshyq tasty zańsyz óndirgender anyqtaldy
PETROPAVL. QazAqparat – Soltústik Qazaqstan oblysynda 25-28 maýsym aralyǵynda «Brakoner» jedel-profılaktıkalyq is-sharasy ótip, nátıjesinde tabıǵatty qorǵaý zańnamasyn buzýdyń 153 deregi anyqtaldy, dep habarlaıdy QazAqparat tilshisi.
SQO Polıtsııa departamenti baspasóz qyzmetiniń málimetinshe, úsh táýlik boıy polıtsııa qyzmetkerleri ekologııa departamenti, orman sharýashylyǵy jáne janýarlar álemi aýmaqtyq ınspektsııasy, tabıǵı resýrstar jáne tabıǵat paıdalanýdy retteý basqarmasynyń qyzmetkerlerimen birge aýqymdy reıdter uıymdastyrdy.
Keshendi jumystyń nátıjesinde oblys aýmaǵynda tabıǵatty qorǵaý zańnamasyn buzýdyń 153 deregi anyqtaldy. Ekologııalyq qylmystarǵa qatysty sotqa deıingi eki tergeý júrgizilýde.
Reıd barysynda Shal aqyn aýdanynda tabıǵı resýrstardy zańsyz paıdalanǵandar ustaldy. Osy aýdannyń tabıǵatty qorǵaý polıtsııasy tobynyń ınspektory Kreşenka eldi mekeni mańyndaǵy eski ken ornynda tehnıkanyń júrgenin baıqaıdy. Ol oqıǵa ornyna jetip, bireýlerdiń arnaıy tıeıtin tehnıkamen eki «KamAZ» kóligine qıyrshyq tas tıep jatqandaryn kóredi.
«Jer qoınaýyn óz betinshe paıdalaný» baby boıynsha is qozǵaldy. Tekseris kezinde JShS biriniń basshysynyń qıyrshyq tasty óz aýmaǵyndaǵy jol men alańǵa, qoımalardyń mańyna tóseý úshin alyp jatqany anyqtaldy. Alaıda ken ornynda jumys istep, óndirýge onyń eshqandaı ruqsat qujaty bolmaǵan. Birneshe kún boıy karerden jalpy salmaǵy 480 tonna qıyrshyq tasty zańsyz tasymaldap, shyǵarǵan. Qazir kelgen shyǵyn mólsheri anyqtalyp jatyr.
Budan basqa «Brakoner» is-sharasy aıasynda «Ań aýlaý qaǵıdalaryn buzý» boıynsha 94 quqyq buzýshy ákimshilik jaýapkershilikke tartyldy. Balyq aýlaý tártibin buzǵan 32 balyqshyǵa aıyppul salyndy.
Tekseris barysynda azamattyq jáne qyzmettik qarýdy jáne onyń patrondaryn satyp alý, saqtaý, paıdalaný nemese tasymaldaý qaǵıdalaryn buzýdyń 21 faktisi anyqtaldy. Barlyq quqyq buzýshylar ákimshilik jaýapkershilikke tartylyp, árqaısysyna zańnamany qatań ustaný qajettiligi túsindirildi.
SQO PD bastyǵynyń birinshi orynbasary Qanat Aıtbaevtyń aıtýynsha, «Brakoner» jedel-profılaktıkalyq is-sharasy eń aldymen zańsyz ańshylyqpen kúresý jáne ekologııalyq qylmystardy ashý boıynsha profılaktıkalyq jumysty uıymdastyrýǵa baǵyttaldy.
Operatsııa aıaqtalǵanymen, oblysta janýarlar men orman sharýashylyǵyn qorǵaý boıynsha jumys jalǵasady.
