SQO-da 500 gektar aýmaq órtenip ketti
PETROPAVL. QazAqparat – Soltústik Qazaqstan oblysy Ǵabıt Músirepov aýdanynda dala órti shyǵyp, jaqyn mańdaǵy aýyldy tilsiz jaýdan aman alyp qalý úshin jalynmen alty saǵat boıy alysýǵa týra keldi, dep habarlaıdy QazAqparat tilshisi.
SQO Tótenshe jaǵdaılar departamenti baspasóz qyzmetiniń málimetinshe, 15 maýsym kúni túske jaqyn Ǵabıt Músirepov aýdanyndaǵy Chıstopole eldi mekenindegi № 20 órt sóndirý bólimshesine Jarkól aýylynyń mańynda qýraǵan dala shóbiniń janyp jatqandyǵy týraly habar túsedi. Oqıǵa ornyna birden kezekshi qaraýyl attanady. Dala órtiniń aýqymyn kórgen mamandar kómekke qosymsha kúsh pen tehnıka suratyp, jergilikti bılikti, erikti órt sóndirý qurylymdaryn habardar etedi.
«Órt Jarkól aýylynan 10 shaqyrymdaı jerde shyqqan eken. Biz kelgende birneshe júzdegen gektar jer janyp jatty. Órtpen kúresti qatty jel qıyndata tústi. Jeldiń baǵyty aýysqan jaǵdaıda eldi meken otqa oranar edi. Oǵan jol bermeý úshin bar kúshimizdi salýǵa týra keldi», - deıdi Ǵ. Músirepov aýdany Tótenshe jaǵdaılar bóliminiń bastyǵy Vladımır Hýtınaev.
Órt sóndirýshilerge «Aqan Seri Orman sharýashylyǵy» KMM jáne ákimdiktiń qyzmetkerleri, jergilikti turǵyndar kómekke keldi. Sondaı-aq órt shyqqanyn estip 60 shaqyrym jerden «SP Garshıno» JShS erikti órt sóndirý qurylymynyń órt sóndirýshileri jetti. Nátıjesinde alty saǵattan keıin jalyn tolyqtaı aýyzdyqtaldy.
Mamandardyń aıtýynsha, órt 500 gektar alqapqa jaıyldy, jedel jáne birlesken is-árekettiń nátıjesinde jalynnyń úlken aýmaqqa taralýyna jáne aýylǵa kirýine jol berilmedi.
