SQO-da 500-ge jýyq jumys orny usynyldy

ASTANA. QazAqparat - Petropavl qalasynda kezekti bos jumys oryndarynyń jármeńkesi ótti. Soltústikqazaqstandyqtardy jumysqa ornalastyrý barysymen óńir basshysy Erik Sultanov jeke tanysty.

Jármeńkege qala jáne oblystyń keıbir aýdandarynan 38 kásiporyn qatysty, olar kelýshilerge jalpy sany 471 bos jumys oryndaryn usyndy. Atalǵan jármeńkege 500 adam qatysty.

Ústimizdegi jyly ótkizilgen bos jumys oryndary jármeńkeleri jóninde oblys ákimi Erik Sultanovqa Petropavl qalasynyń jumyspen qamtý jáne áleýmettik baǵdarlamalar bóliminiń basshysy Gúlmıra Jákenqyzy baıandap ótti.

Oblys ákimi bos jumys oryndaryn usynǵan jumys berýshi kompanııalardyń qyzmetkerlerge qoıatyn talabyn jáne usynylatyn jalaqy mólsheri týraly surady. Erik Sultanov jumys berýshilerge tájirıbesi bar qyzmetkerlermen qatar, jas mamandardy da qyzmetke tartýǵa usynys bildirdi.

«Tájirıbesi joq mamandy alyp, úıretken durys, budan bólek, jalaqysy da jaqsy bolýy qajet. Mysaly, ınjenerdiń jalaqysy 100 myńnan kem bolmaýy kerek. Sonda ǵana jaqsy maman, soǵan sáıkes jaqsy tehnologııa bolady», - dep atap ótti Erik Sultanov.

Jyl basynan beri oblysta barlyǵy 8 bos jumys oryndarynyń jármeńkesi ótkizildi. Onda 134 kásiporyn men túrli uıymdar 1671 bos jumys oryndaryn usyndy.

Bos jumys oryndarynyń jármeńkelerine qatysý arqyly 341 adam jumyspen qamtylsa, olardyń 73-i turaqty jumysqa ornalasqan. Al, 42-i ýaqytsha qoǵamdyq jumystarǵa tartylsa, 7-i áleýmettik jumys oryndaryna alyndy. Taǵy 21-ne qaıta daıarlaý kýrstarynda oqýǵa joldama berildi.