SQO-da 50 paıyz ústemeaqy úshin kásipkerler jaýapqa tartyldy
PETROPAVL. KAZINFORM – Soltústik Qazaqstan oblysynda áleýmettik mańyzy bar azyq-túlik taýarlarynyń baǵasyna baqylaý kúsheıtildi. 2026 jyldyń basynan beri óńirdegi 20-ǵa jýyq kásipker shekti ruqsat etilgen saýda ústemeaqysyn asyrǵany úshin bıýdjetke 1,5 mıllıon teńgeden astam aıyppul tólegen. Bul týraly Saýda jáne ıntegratsııa mınıstrligi habarlady.
Áńgime memleket ústemeaqy mólsherine shekteý belgilegen áleýmettik mańyzy bar azyq-túlik taýarlarynyń (ÁMAT) tizbesine engizilgen ónimder týraly bolyp otyr. Eń jıi anyqtalǵan zańbuzýshylyqtardyń qatarynda kartop, sábiz, kúrish, alma jáne ózge de negizgi azyq-túlik túrleriniń baǵasyn negizsiz kóterý bar. Keıbir jaǵdaılarda saýda ústemeaqysy ruqsat etilgen deńgeıden 50 paıyzdan astamǵa asyp ketken.
Tekserýlerge Memlekettik kirister departamenti usynǵan elektrondyq shot-faktýralar negiz boldy. Qujattardy taldaý barysynda mamandar ónimniń satyp alý baǵasyn saýda núktelerindegi sońǵy baǵamen salystyryp, qoldanylǵan ústemeaqy mólsherin obektıvti túrde baǵalady. Mundaı tásil sýbektıvtilikti boldyrmaı, tek qarjylyq qujattarǵa súıenýge múmkindik beredi.
Vedomstvo ókilderiniń aıtýynsha, baǵa shekteýleriniń saqtalýyna baqylaý turaqty túrde júrgiziledi. Monıtorıng iri saýda jelilerin de, úı mańyndaǵy shaǵyn dúkenderdi de qamtıdy. Ruqsat etilgen ústemeaqynyń asyp ketkeni anyqtalǵan jaǵdaıda kásipkerlerge zańbuzýshylyqtardy joıý týraly nusqama berilip, ákimshilik aıyppul salynady.
Sarapshylar áleýmettik mańyzy bar ónimderdiń baǵasyn retteý, eń aldymen, halyqtyń, ásirese áleýmettik turǵydan osal toptardyń múddesin qorǵaýǵa baǵyttalǵanyn atap ótedi. Azyq-túlik naryǵyndaǵy qubylmalylyq pen shyǵyndardyń ósýi jaǵdaıynda memleket birinshi kezektegi taýarlar baǵasynyń negizsiz qymbattaýyna jol bermeýge tyrysady.
Saýda jáne tutynýshylardyń quqyqtaryn qorǵaý departamentinde kásipkerlerge zań talaptaryn qatań saqtaý qajettigi eskertildi. Zańbuzýshylyqtar tek josparly tekserýler barysynda ǵana emes, tsıfrlyq derekterge júrgizilgen taldaý nátıjesinde de anyqtalady. Mamandardyń pikirinshe, mundaı baqylaý tetigi naryqtyń ashyqtyǵyn arttyryp, adal básekelestiktiń qalyptasýyna yqpal etedi.
Óńirdegi baǵa turaqtylyǵyn qamtamasyz etý jumystary aldaǵy ýaqytta da jalǵasady. Vedomstvolar bıznes ókilderin satylatyn taýarlardyń áleýmettik mańyzyn eskerip, belgilengen saýda ústemeaqysy normalaryn saqtaýǵa shaqyrady. Bul aıyppul sanktsııalarynan saqtanyp, tutynýshylar senimin nyǵaıtýǵa múmkindik beredi.
Budan buryn Túrkistanda 40-qa jýyq kásipkerdiń demalys aımaqtary salynǵan jerleri daýǵa qalǵanyn jazǵan edik.