SQO-da 5 jasar bala tabıǵat aıasyna ata-ájesimen shyǵyp, joǵalyp ketken

PETROPAVL. QazAqparat – Soltústik Qazaqstan oblysynda kól basyna ata-ájesimen serýenge shyǵyp, oınap júrip adasyp ketken bala aman-esen tabyldy. Ony sol mańda reıdte júrgen tabıǵatty qorǵaý polıtsııasy tobynyń qyzmetkeri baıqap qalǵan, dep habarlaıdy QazAqparat tilshisi.

SQO polıtsııa departamenti baspasóz qyzmetiniń málimetinshe, oqıǵa Aqqaıyń aýdanynda bolǵan. Egde jastaǵy erli-zaıypty Petropavldan qonaqqa kelgen 5 jasar nemeresin ertip, kól jaǵasynda serýendemek bolǵan. Er bala oınap júrip, alystap ketken. Nemereleriniń kózden ǵaıyp bolǵanyn aýyl turǵyndary da kesh baıqaǵan.

Bala ormanǵa kirip, adasyp ketken. Biraz júrgennen keıin kólik qozǵalysy kóp «Petropavl – Býlaevo» jolyna shyqqan. Sol kezde ony tabıǵatty qorǵaý polıtsııasy tobynyń qyzmetkeri baıqap qalǵan. Tártip saqshysy «Ýyldyryq shashý» aktsııasy aıasynda reıdtik is-sharaǵa shyqqan eken.

Bala polıtseıge kól jaǵasynan kelgenin aıtqan. Tártip saqshysy búldirshindi kólikke otyrǵyzyp, jaqyn mańdaǵy ormandar men kólderdi aralap, onyń ata-ájesin izdeıdi. Kóp uzamaı nemerelerin sharq uryp izdegen erli-zaıyptynyń «VAZ-2115» avtokóligi de kózge tústi.

«Búldirshin jaqyndaryna aman-esen tapsyryldy. Zeınetkerlermen profılaktıkalyq áńgime júrgizildi. Barlyq turǵyndardan kishkentaı balalaryna bas-kóz bolyp, qaraýsyz qaldyrmaýdy suraımyz», - deıdi Aqqaıyń aýdandyq polıtsııa bóliminiń bastyǵy Rýslan Saparov.