SQO-da 5 myńǵa jýyq soǵys tutqyny jaıynda málimet saqtalǵan
Soltústik Qazaqstan memlekettik arhıvi «My pomnım vashı ımena» atty Ekinshi dúnıejúzilik soǵys jaýyngerlerine arnalǵan elektrondy bazany quryp jatyr. Sonyń bir bólimi fashısterde tutqynda bolǵan oblys turǵyndaryna arnalmaq. SQO polıtsııa departamentiniń aqparat jáne baılanys basqarmasynyń arnaıy memlekettik arhıvi bazany jasaýǵa óz úlesin qosyp, 4755 adam boıynsha málimet berdi.
«2014 jyly SQO Ulttyq qaýipsizdik komıteti departamenti ishki ister organdaryna tarıhı asa qundy úsh arhıvtiń qoryn tapsyrdy. Onyń ishinde HH ǵasyrdyń 30-50 jyldary qýdalaýǵa ushyraǵan azamattardyń jáne aqtaýǵa jatpaıtyndardyń qylmystyq isteri, soǵys tutqyndary men Germanııadan elge qaıta oralǵan adamdardyń fıltratsııalyq isteri bar. Biz bul qorlardy tsıfrlandyryp, jiktep, toptadyq. Bul qujattarǵa tarıhshylar, ólketanýshylar, ustazdar men oqýshylar qyzyǵýshylyq tanytyp, ǵylymı zertteýler júrgizdi. Uly Jeńistiń 75 jyldyǵy qarsańynda «My pomnım vashı ımena» jobasyna qatysyp, úles qosqanymyzǵa qýanyshtymyz», - deıdi SQO PD arnaıy memlekettik arhıv tobynyń bas mamany Elmıra Valıýlına.
SQO polıtsııa departamenti baspasóz qyzmetiniń málimetinshe, aqtalǵandar jáne tutqynnan aman oralǵandar týraly aqparatty QR ІІM saıtyndaǵy «Memorıal» jáne «UOS áskerı tutqyndary» bólimshelerinen alýǵa bolady. Sondaı-aq týystyqty raıtaıtyn qujat bolǵan jaǵdaıda halyqqa qyzmet kórsetý ortalyǵy málimet beredi nemese «Azamattarǵa arnalǵan Úkimet» memkorporatsııasy arqyly polıtsııa departamentiniń arhıvinen anyqtama alýǵa múmkindik bar. Ol qujatta zańsyz qýdalanǵan nemese tutqynnan oralǵan azamat jaıynda barlyq qoljetimdi málimet kórsetiledi.
Byltyr arnaıy arhıvtiń mamandary 500-den astam memlekettik qyzmet kórsetti. Onyń 22-si qýdalaýǵa ushyraǵan týystary jaıynda arhıvtik anyqtama alsa, taǵy 8 adam soǵys tutqynynda bolǵan týystary jaıynda málimetpen tanysqan.
