SQO-da 5 mlrd teńgelik zaýyttyń qurylysy toqtap qalýǵa shaq qaldy

ASTANA. KAZINFORM — Soltústik Qazaqstan oblysy Qyzyljar aýdanynda túıirshiktelgen jońyshqa óndiretin zaýyttyń qurylysy elektr qýatyna qosylý máselesine baılanysty kesheýildegen. 

elektr energııasy
Foto: Kazinform/JI

Prokýratýranyń málimetinshe, Salar Farm JShS júzege asyryp jatqan ınvestıtsııalyq jobanyń quny — 5 mlrd teńge. Aýdan prokýratýrasy jobany súıemeldeý barysynda zaýyt qurylysyn tejep turǵan máseleni anyqtaǵan.

Nysandy qurylysty jalǵastyrý úshin Báıterek aýylynyń mańyndaǵy qosalqy stantsııadan elektr jelisine qosý qajet bolǵan.

—  Osyǵan baılanysty aýdan prokýratýrasy Qyzyljar aýdanynyń ákimine máseleni sheshýge járdemdesý týraly hat joldady. Nátıjesinde merdiger «Bear Injınırıng» JShS qosalqy stantsııadan zaýytqa deıin elektrmen jabdyqtaý jumystaryn aıaqtady, — delingen habarlamada.

Osylaısha, ınvestıtsııalyq jobany iske asyrýǵa kedergi bolǵan másele sheshilip, zaýyt qurylysyn jalǵastyrýǵa jaǵdaı jasaldy.

Eske salaıyq, buǵan deıin Ulytaý oblysyndaǵy iri jobaǵa ózge kompanııanyń 23 mln teńge qaryzy kedergi bolǵanyn habarlaǵanbyz.