SQO-da 5 mlrd teńgege tasqyn shaıǵan qorǵanys bógetteri qalpyna keltirilip jatyr
PETROPAVL. KAZINFORM – Soltústik Qazaqstan oblysynda kóktemgi alapat tasqynda qorǵanys bógetterin jáne avtojoldardyń keıbirin sý shaıyp ketti. Qalpyna keltirý jumystary aıaqtalýǵa jaqyn. Bógetterdi kóterip, nyǵaıtýǵa ǵana 5 mlrd teńgeden astam qarajat jumsaldy.
Bıylǵy sý tasqynynyń saldaryn joıý jáne 2025 jylǵy kóktemgi sý tasqynyna daıyndyq jumystary «AMANAT» partııasy janyndaǵy óńirlik damý jónindegi keńestiń otyrysynda aıtyldy.
«AMANAT» partııasy SQO fılıaly baspasóz qyzmetiniń málimetinshe, Petropavl qalasy men Qyzyljar aýdanyndaǵy 8 qorǵanys bógetin qalpyna keltirýge «Demeý» korporatıvtik qorynan 4,8 mlrd teńge bólindi. Taǵy 627,6 mln teńge jergilikti bıýdjetten jumsaldy. Jumys qyzý júrip jatyr. Buzylǵan bógetter qaıta salynyp, barynsha nyǵaıtylady.
«Avtojoldardyń zaqymdalǵan 42 ýchaskesiniń 38-i tolyǵymen qalpyna keltirildi. Bul úshin QR tótenshe rezervinen 5,2 mlrd teńge bólindi. Búgingi kúni 4 ýchaskede qalpyna keltirý jumystary jalǵasyp jatyr. «KAZ Minerals Demeu» kompanııasynyń qarajaty esebinen Petropavldaǵy birinshi kótergish sorǵy stantsııasynda 3,2 mlrd teńgege qaıta jańartý jobasy júzege asyrylady. Búgingi tańda birinshi kezeńniń qurylys-montaj jumystary aıaqtaldy», - deıdi oblys ákiminiń orynbasary Qanat Dúzelbaev.
Qazirgi ýaqytta tasqyn qulatqan 184 tirek qalpyna keltirilip, 12 km elektr taratý jelileri salyndy. Sý basqan eldi mekenderde qosymsha 33,9 km elektrmen jabdyqtaý jelileri salynyp, 480 tirek ornatyldy. Jalpy káriz kollektorlaryn, joldardy, elektr jelilerin, bilim berý nysandaryn jóndeýge, bógetterdi nyǵaıtýǵa jáne ornatýǵa, qoqystardy shyǵarýǵa jáne basqa da is-sharalarǵa jergilikti ákimdiktiń tótenshe rezervinen 12 mlrd teńgeden astam qarajat bólingen.
Bıylǵy kóktemde SQO-da barlyǵy 3898 úıdi sý basqan bolsa, onyń 2191-i Petropavlda. Qalǵan 1546-sy Qyzyljar aýdanynda tirkelgen. Sý tasqyny saldarynan uzyndyǵy 44 km elektr taratý jelisiniń 414 baǵany zaqymdandy.
Esterińizge salaıyq, «Birlik» shaǵyn aýdanynda tasqynnan zardap shekkenderge arnalyp salynǵan úılerdiń sońǵy legi 15 qyrkúıekte saltanatty túrde paıdalanýǵa berildi. Shamamen bes aıdyń ishinde jazyq dalada 700 úıi bar eldi meken paıda boldy.
