SQO-da 5 kúnde jasóspirimderdiń túnde serýendeýiniń 84 deregi tirkeldi

PETROPAVL. KAZINFORM – Soltústik Qazaqstan oblysynda «Quqyqtyq tártip» jedel-profılaktıkalyq is-sharasy aıasynda ıývenaldyq polıtseıler túngi reıdterdi kúsheıtti. 5 kún ishinde jasóspirimderdiń túngi ýaqytta úıden tys júrýiniń 84 faktisi anyqtaldy. Olardyń ata-analary ákimshilik jaýapkershilikke tartyldy.

SQO polıtsııa departamenti baspasóz qyzmetiniń málimetinshe, 5 kún ishinde soltústikqazaqstandyq polıtseıler jalpy 2339 ákimshilik quqyq buzýshylyqty anyqtady. «Quqyqtyq tártip» jedel-profılaktıkalyq is-shara kezinde polıtsııanyń qoǵamdyq qaýipsizdikti qamtamasyz etý jónindegi barlyq baǵyty jumysty kúsheıtti.

«Jazǵy demalys kezinde bos ýaqyttaryn úıden tys ótkizetin jasóspirimderdiń qaýipsizdigine polıtseıler erekshe kóńil bóledi. Desek te, oblys turǵyndarynan kámeletke tolmaǵan balalaryna kóbirek kóńil bólýdi, olardyń bos ýaqytyn tıimdi uıymdastyrýdy suraımyz. Jasóspirimderdiń qaraýsyz júrýi olardyń tarapynan jáne olarǵa qatysty qylmystar men quqyq buzýshylyqtardyń jasalýyna alyp kelýi múmkin», - deıdi SQO PD jergilikti polıtsııa qyzmeti basqarmasy bastyǵynyń mindetin atqarýshy Aleksandr Rozbah.

1 maýsymnan bastap tártip saqshylary esepte turǵan 2 myńnan astam adamdy tekserdi. Onyń ishinde turmysy qolaısyz 236 otbasy da bar. Kámeletke tolmaǵan balalaryn tárbıeleý boıynsha mindetterin oryndamaǵan 33 zańdy ókil ákimshilik jaýapkershilikke tartyldy.

Buǵan deıin ІІM júrgizýshilerge úndeý jasaǵanyn jazǵan edik.