SQO-da 49 qoqys polıgony ruqsatsyz paıda bolǵan
SQO qoǵamdyq keńesinde birqatar ózekti másele talqyǵa tústi, sonyń biri – qatty turmystyq qaldyqtar tógetin oryndardyń zańsyz kóbeıýi.
Ekologııa departamentiniń basshysy Azamat Bektasovtyń málimetinshe, byltyr «Qazaqstan Ǵarysh Sapary» AQ derekteri boıynsha osyndaı ruqsat etilmegen 232 oryn anyqtalǵan. Vedomstvo jergilikti atqarýshy organdardyń atyna zańsyz polıgondardy joıý qajettiligi týraly hat joldady, nátıjesinde ruqsat etilmegen qoqys oryndarynyń 98%-y nemese 224-i joıyldy.
«Bıyl «Qazaqstan Ǵarysh Sapary» UK» AQ málimetteri boıynsha oblys aýmaǵynda qoqysty zańsyz tógýdiń 69 orny anyqtaldy, onyń 20-synda turmystyq qatty qaldyqtar belgilengen shekaralardy buza otyryp tógilgen. Búgingi tańda 32 polıgon joıyldy. 7-ýi boıynsha aqparat rastalmady», - deıdi Azamat Bektasov.
Departament basshysynyń aıtýynsha, mınıstrliktiń tapsyrmasyna sáıkes vedomstvo máseleni sheshýdiń josparyn ázirledi. Osy jospardy oryndaý aıasynda mobıldi jumys toby quryldy, onyń quramynda ekologııa departamentiniń, polıtsııa departamentiniń, tabıǵı resýrstar jáne tabıǵatty paıdalanýdy retteý basqarmasynyń qyzmetkerleri jáne qoǵam ókilderi bar.
«Mobıldi jumys toby Petropavl boıynsha, Qyzyljar aýdanyna, Aqqaıyń aýdanyna, Mamlıýt jáne M. Jumabaev aýdandaryna baryp, jaǵdaıdy kórdi, ruqsaty joq polıgondardy anyqtady. Byltyr osyndaı jumys barysynda mobıldi top qaldyqty zańsyz tókken 106 oryndy tapty. Onyń 96-sy joıyldy.
Bıyl qyzmetkerler ruqsat etilmegen 60 qaldyq tógý ornyn, onyń jartysy Petropavlda ornalasqan, anyqtap, 20-sy joıyldy», - deıdi Azamat Bektasov.
Mamannyń aıtýynsha, bul máseleni sheshý úshin qatty turmystyq qaldyqtardy ornalastyratyn jańa polıgondar salý qajet.
Sondaı-aq, qalalyq jáne aýyldyq eldi mekenderde polıgondardy resimdeý men salýdy jeńildetý maqsatynda onyń tıptik qaǵıdalaryn ázirleýdi usyndy.
