SQO-da 49 eldi mekende sý sapasy jaqsardy

NUR-SULTAN. QazAqparat – Soltústik Qazaqstan oblysynda eldi mekende aýyz sý sapasy jaqsardy. Bul týraly oblys ákimi Qumar Aqsaqalov Ortalyq kommýnıkatsııalar qyzmetindegi baspasóz máslıhatynda aıtty, dep habarlaıdy QazAqparat tilshisi.

«2021 jyly Soltústik Qazaqstan oblysynda jol jelisin jóndeý boıynsha keshendi jumystar júrgizildi. 813 shaqyrym jol jóndeldi. Aýylishilik joldardy jóndeý jumystary jalǵasty. 44 aýylǵa asfalt tóseldi. Bıyl oblystaǵy jaqsy joldardyń úlesi 74 paıyzdy qurady. 4 jyldan keıin bul kórsetkish 98 paıyzǵa deıin kóteriledi. Jóndeý jumystary 2,1 myń shaqyrym joldy qamtıdy. Bul baǵyttardyń boıynda 350 aýyl bar», -dedi óńir basshysy.

Onyń atap ótýinshe, óńirdegi ózekti máselelerdiń biri – sýmen qamtamasyz etý. 2021 jyly bul salany qarjylandyrý 1,8 esege, 11,4 mlrd teńgege deıin ulǵaıtyldy.

«49 eldi mekende aýyz sý sapasy jaqsartyldy. Aýyldarda 159 shaqyrym jeli tartylyp, 3 myń otbasy ortalyq sý júıesine qosyldy. 11 myń adam turatyn 18 aýyldy baılanystyratyn Presnov toptyq sý qubyrynyń ekinshi kezegi iske qosyldy. Aldaǵy 4 jylda 78 aýyldyń sý máselesi sheshilmek. Aýyl turǵyndaryn sýmen qamtamasyz etý 100 paıyzǵa jetpek», - dedi Qumar Aqsaqalov.