SQO-da 48 ga astam ormandy alqap joıylyp, ken ıgerý ornyna aınalmaq
PETROPAVL. QazAqparat – Soltústik Qazaqstan oblysyndaǵy Aıyrtaý aýdanynda 48 ga astam ormandy alqap joıylyp, jer qalaıy kenin ıgeretin kompanııaǵa berilmek, dep habarlaıdy QazAqparat tilshisi.
Soltústik Qazaqstan oblystyq ákimdiginiń málimetinshe, «Tin One Mining» AQ quramynda qalaıy bar ken ornyn ıgerýge quqyǵy bar otandyq ınvestor. Kompanııa jumys istep jatqan Aıyrtaý aýdanyndaǵy «Syrymbet» ken orny Imantaý-Shalqar kýrorttyq aımaǵyna kirmeıdi. Ol Syrymbet aýylynan 15 shaqyrym, Saýmalkólden 25 shaqyrym jerde ornalasqan. Ken orny aýmaǵynyń shamamen 48,5 ga jerin ormandy alqap alyp jatyr. Munda 3 myń tekshe metr aǵash bar. Basym bóligi - qaıyń.
«Salystyrý úshin aıtsaq, SQO-da jylyna 350 myń tekshe metr qaıyń otyn úshin daıyndalady. Al orman qorynyń jerin «Tin One Mining» AQ berý kompanııany orman sharýashylyǵy óndirisiniń shyǵyndaryn óteý boıynsha bıýdjetke tólemder jasaýdan basqa, joıylatyn ýchaske aýdanynan eki ese mólsherde, ıaǵnı 97 gektar alqapqa aǵash otyrǵyzýdy mindetteıdi», - deıdi SQO kásipkerlik jáne ındýstrııalyq-ınnovatsııalyq damý basqarmasy basshysynyń orynbasary Nurjan Sadyqov.
Taý-ken metallýrgııa kombınatyn salý nátıjesinde qalaıy óndirilip qana qoımaı, tereń óńdeletin de bolady. ıAǵnı kásiporyn ónim shyǵarý boıynsha tolyq tsıkldy qamtıdy. Jylyna orta eseppen 2,5 mln tonna ken óndirilmek. Jobany júzege asyrý nátıjesinde Qazaqstan álemdegi eń iri qalaıy óndirýshilerdiń ondyǵyna kirýge múmkindik alady.
«Syrymbet» ken ornyna jumsalatyn ınvestıtsııalardyń jalpy kólemi - 130 mlrd teńgeden astam. Bul - oblys jáne jalpy elimizdiń ekonomıkasyna quıylatyn jeke ınvestıtsııalar. Negizinen jergilikti turǵyndardy tartý esebinen 600 jańa jumys ornyn qurý josparlanǵan. Jyl saıyn shamamen 5 mlrd teńgege jýyq salyq aýdarymdary jasalmaq. Bul qarajat óńirdiń áleýmettik-ekonomıkalyq damýyna baǵyttalady», - deıdi Nurjan Sadyqov.
Joba iske asyryla bastaǵaly 18 mlrd teńgeden astam ınvestıtsııa quıylyp, 500 mln teńgeden astam salyq aýdarymdary jasalǵan.
