SQO-da 48 adam tumaýǵa jatpaıtyn vırýstardy juqtyrdy

PETROPAVL. KAZINFORM — Soltústik Qazaqstan oblysynda epıdmaýsym bastalǵaly 221 adam tumaýratsa, taǵy 48-i tumaýǵa jatpaıtyn vırýstardy juqtyrǵan. 

SQO sanıtarııalyq-epıdemıologııalyq baqylaý departamentiniń málimetinshe, jalpy tumaýǵa jatpaıtyn vırýstarǵa 380 synama alynǵan. Oń nátıje bergenderdiń ishinde rınovırýstardyń úlesi joǵary — 58% nemese 28 adam syrqattanǵan. Juqtyrǵandardyń basym bóligi — 4 jasqa deıingi náresteler. Bokavırýs dıagnozy 10 adamǵa qoıylsa, syrqattanǵandardyń deni — eresekter. Adenovırýsty 4 adam juqtyrsa, aýyrǵandardyń barlyǵy — 14 jasqa deıingi balalar. RS-vırýsty juqtyrýdyń 6 deregi tirkeldi.

Epıdmaýsym bastalǵaly oblysta JRVI-men 49 myń adam aýyrdy. Bul ótken jyldyń uqsas merzimimen salystyrǵanda 9% tómen. Syrqattanǵandardyń shamamen 32 myńy nemese 65% — 14 jasqa deıingi balalar.

Tek ótken aptada JRVI-di 2,3 myń turǵyn juqtyryp, dáriger kómegine júgingen. Degenmen sýyq tıip aýyrǵandar 7% tómendep otyr.

Mamandar aýrýdyń aldyn alý úshin spetsıfıkalyq emes profılaktıkany esten shyǵarmaýǵa keńes beredi. Múmkindiginshe adamdar kóp jınalatyn oryndarǵa barmaý, barǵan jaǵdaıda betperde taǵý, áleýmettik araqashyqtyqty saqtaý, jeke bas gıgıenasyn saqtaý — qoldy sabynmen múmkindiginshe jıi jýý kerek. Sebebi tumaý vırýsy turmystyq zattar arqyly da juǵady. Dárigerler sonymen qatar ımmýnıtetti barlyq qoljetimdi tásildermen — shynyǵý, jumys pen demalys rejımin saqtaý, mıkroelementter men vıtamınderge, ásirese «S» vıtamınine baı tolyqqandy tamaqtaný qajettigin eske salady.

Buǵan deıin ShQO-da tumaýmen syrqattaný segiz ese óskenin jazǵan edik.

Al Aqtóbede balalar arasynda qyzylsha juqtyrǵandar sany kóbeıgen.