SQO-da 46 asyl tuqymdy iri qarany urlaǵan kúdiktiler ustaldy
ASTANA. QazAqparat - Soltústik Qazaqstan oblysy Ýálıhan aýdanynda iz-tússiz joǵalyp ketken «aberdın angýs» tuqymdas 46 iri qaraǵa qatysty qylmys ashyldy, dep habarlaıdy QazAqparat tilshisi SQO ІІD baspasóz qyzmetine silteme jasap.
Ýálıhan aýdanyndaǵy sharýa qojalyqtyń malshylary áý basta sıyrlarynyń joǵalyp ketkenin sezbegen de kórinedi. Birneshe kún boıy iri qaralardyń alysqa jaıylyp ketti degen oımen izdestirgen. Tek tappaǵannan keıin ǵana sıyrlardyń adasyp ketýine urylardyń «kómekteskeni» sebep bolǵanyn bilip, quqyq qorǵaýshylarǵa habarlaǵan.
«Sharýa qojalyqtan 80 shaqyrym jerde quqyq qorǵaýshylar en dalada iri qaralardyń soıylyp, etteri belgisiz jaqqa jóneltilgenin anyqtaıdy. Aqyry, polıtseıler iz kese kele buryn da osyndaı qylmysqa qatysy bar degen kúdikpen 4 kúdiktini qolǵa túsirdi. Kúdiktilerdiń bári de Aqmola oblysynyń turǵyndary», - dep habarlaıdy SQO ІІD baspasóz qyzmetinen.
Atalǵan jaǵdaı boıynsha QR QK-niń 188-baby 4-bóligimen qylmystyq is qozǵalǵan. Kúdiktilerdiń kinási dáleldengen jaǵdaıda olar 10 jylǵa deıin bas bostandyqtarynan aıyrylýy múmkin.
