SQO-da 459 medıtsınalyq qyzmetker ústemeaqy aldy
PETROPAVL. QazAqparat – Soltústik Qazaqstan oblysynda SOVID-19 vırýsymen kúreske tartylǵan medıtsına qyzmetkerlerine naýryz aıy úshin ústemeaqy berildi, dep habarlaıdy QazAqparat tilshisi.
SQO Densaýlyq saqtaý basqarmasynyń málimetinshe, óńirde epıdemııaǵa qarsy sharalarǵa qatysqan 459 medıtsınalyq qyzmetker eńbekaqysyna qosymsha ústemeaqy aldy. Birinshi aıda tólengen qarajattyń jalpy somasy – 43,9 mln teńge.
«Qazirgi jaǵdaıda medıtsınalyq qyzmetkerlerge áleýmettik qoldaý kórsetý maqsatynda qolǵa alynǵan shara. Mundaı tólemder sáýirde de jasalady. Bul aqsha Mindetti medıtsınalyq saqtandyrý qorynyń rezervinen beriledi. QR Densaýlyq saqtaý mınıstriniń 4 sáýir 2020 jylǵy buıryǵyna sáıkes koronavırýspen kúreske jumyldyrylǵan medıtsınalyq qyzmetkerlerdi qarjylaı qoldaý maqsatynda tólendi», - deıdi Densaýlyq saqtaý basqarmasy jetekshisiniń orynbasary Meırambek Ahmetov.
Tólemder naqty jumys istegen ýaqytyna baılanysty, koronavırýs ınfektsııasymen tikeleı jumys isteıtin úsh qaýip tobyna sáıkes júrgiziledi.
«1-top - «Óte joǵary qaýip». Bul topqa jatatyndarǵa 850 myń teńge ústemeaqy beriledi. Ekinshi táýekel toby úshin 425 myń teńge, al úshinshige qaraıtyndarǵa eń tómengi 5 eńbekaqy mólsherinde beriledi. Bul jerde ár medıtsınalyq qyzmetkerdiń naqty jumys istegen ýaqyty esepke alyndy. Naýryz aıynda oblysta birinshi syrqat qashan anyqtaldy, sol kúnnen bastap tólem júrgizildi», - deıdi Meırambek Ahmetov.
Qazir oblysta 459 medıtsınalyq qyzmetker qaýipti indetpen kúreske jumyldyrylǵan. Qajet bolǵan jaǵdaıda olardyń sany artýy múmkin. Qosymsha tólemder jedel járdem qyzmetkerlerine, sondaı-aq blokposttardaǵy karantın rejımin qamtamasyz etetin medıtsınalyq qyzmetkerlerge de tólenbek.
