SQO-da 450-den astam qoqys polıgony bolsa, sonyń 12-siniń ǵana qujaty túgel
PETROPAVL. QazAqparat – Soltústik Qazaqstan oblysynda jumys istep turǵan 454 turmystyq qaldyqtar polıgonynyń 12-siniń ǵana tıisti qujattary bar. Keıbiriniń tipti jer aktisi de joq, dep habarlaıdy QazAqparat tilshisi.
SQO ekologııa departamenti Azamat Bektasovtyń aıtýynsha, óńirdegi qatty qaldyqtardy ornalastyrý polıgondarynyń 335-inde jer aktileri resimdelgen, 119-ynda jer aktisi joq. Búgingi tańda 12 polıgon ǵana ruqsat qujattamasyna ıe. Alaıda, olardyń ózi ekologııalyq zańnama talaptaryn oryndaı bermeıdi. Solardyń biri – Petropavldaǵy «Qyzyljar Tazalyq» JShS. Kásiporynǵa 250 myń teńge shamasynda aıyppul salyndy.
«Sonymen qatar, jeke tulǵa N. Alekseenkonyń SQO mamandandyrylǵan tabıǵat qorǵaý prokýratýrasyna joldaǵan ótinishi negizinde Taıynsha aýdany Mıronov aýyldyq okrýgi ákimdigine qatysty jospardan tys tekserý júrgizildi. Nátıjesinde, birqatar zań buzýshylyq anyqtaldy. Sot qaýlysymen laýazymdy tulǵa, Mıronov aýyldyq okrýgi ákimi jalpy somasy 2 496 345 teńge aıyppul túrinde ákimshilik jaýapkershilikke tartyldy», - deıdi Azamat Bektasov.
Ekologtiń aıtýynsha, zańsyz paıda bolǵan qatty turmystyq qaldyqtar polıgondaryn anyqtap, joıý boıynsha jumystar júıeli túrde júrgizilip keledi. Byltyr SQO-da osyndaı 363 oryn anyqtalsa, bıyl 233-i tabyldy. Sonyń ishinde 167 polıgon ruqsatsyz ashylǵan, 63-i belgilengen shekaradan asyp ketken, taǵy úsheýin eriktiler anyqtaǵan.
«Búginde qaldyqtardy ruqsatsyz ornalastyrýdyń 213 orny joıyldy, bul – 91%. Qaldyqtardy ornalastyrýdyń ruqsat etilmegen oryndaryn joıý jáne tıisti sharalar qabyldaý maqsatynda jergilikti ákimdikterge jáne SQO polıtsııa departamentine hat joldandy. Ruqsat etilmegen jerge qoqys qaldyrǵany úshin ákimshilik jaýapkershilikke 5 adam tartyldy, olarǵa jalpy somasy 153 150 teńge aıyppul salyndy», - deıdi Azamat Bektasov.
Aıta ketsek, Astanada belgilenbegen jerge qoqys tókken 600-den astam júrgizýshige aıyppul salynǵan.
