SQO-da 40 shaqty adam májbúrli túrde maskúnemdik pen nashaqorlyqtan emdelýge jiberildi

PETROPAVL. QazAqparat – Soltústik Qazaqstan oblysynda polıtseıler jyl basynan 36 adamdy ortalyqqa maskúnemdik pen nashaqorlyqtan emdelýge májbúrlep ornalastyrdy. Bul ótken jylmen salystyrǵanda 11 adamǵa kóp, dep habarlaıdy QazAqparat tilshisi.

SQO polıtsııa departamenti baspasóz qyzmetiniń málimetinshe, Petropavldyń 35 jastaǵy turǵyny araqqa toıyp alyp, anasynyń berekesin alǵan. Áıel balasynyń qylyǵyna shydamaı birneshe ret úıinen ketýge májbúr bolǵan. Er adam maskúnem ǵana emes, esirtkige de áýes eken. Birneshe ret urlyq jasap, jaýapkershilikke de tartylǵan. Shydamnyń da shegi bar. Áıel úıdegi zattar joǵala bastaǵanda ǵana polıtsııaǵa júginip, kómek surady. Er adam tıisti qujattardy jınaýǵa tartynshaqtanǵanymen, ýchaskelik polıtsııa ınspektory ony medıtsınalyq komıssııadan ótkizip, barlyq josyqtardy jasady. Endi otbasynyń shyrqyn buzýshy aldaǵy jarty jyl boıy narkologııalyq dıspanserde májbúrli túrde emdeledi.

«Alkogol jáne esirtkige táýeldilikten zardap shegetin adamdardy emdeýge jiberý arqyly kóptegen qylmystyń aldyn alýǵa bolady. Onyń ishinde eń kóp taraǵan túri — bótenniń múlkin urlaý, turmystyq zorlyq-zombylyq. Bul qylmystarǵa qarsy kúresti QR Prezıdenti Qazaqstan halqyna Joldaýynda basymdyqtardyń biri retinde belgiledi. Maskúnem, nashaqor adamdardyń týystaryna májbúrlep emdeýdi keıinge qaldyrmaýdy suraımyz. Tájirıbe kórsetkendeı, táýeldi adamdardyń kópshiligi táýeldilikten óz betinshe qutyla almaıdy. Erte me, kesh pe alkogol men esirtki adamdy qylmystyq quqyq buzýshylyqqa ıtermeleıdi», - deıdi Petropavl qalalyq polıtsııa basqarmasy bastyǵynyń birinshi orynbasary Álibek Ǵabdýllın.

Jyl basynan beri Petropavlda polıtsııa qyzmetkerleri 36 adamdy májbúrli túrde emdeýge jiberdi, bul ótken jyldyń osy kezeńimen salystyrǵanda 11 adamǵa kóp.